Ufuna ukuhlanganisa izinhlanga ngomculo
NEZIQU ZE-HONOURS
ININGIZIMU Afrika isesikhathini lapho kukhuthazwa khona ubumbano ezinhlangeni ezahlukene kanti kuyaziwa ukuthi umculo ngenye yezinto ezihlanganisa abantu bamazinga ehlukene, futhi bezinhlanga ezahlukene emhlabeni.
Abaziyo bathi lulodwa ulimi lomculo, ngisho umculi angacula ngolimi ongaluzwa kodwa uma ingoma imnandi, lokhu akusho lutho. Bambalwa eningizimu Afrika abaculi abakwazi ukungenisa ezinhlangeni ezahlukene ngomculo wabo kanti uholly Wasserfall, owaziwa kakhulu ngoholly Rey, ungomunye walabo abakhombisile ukuthi umculo awukhethi bala, kodwa ngowabo bonke abantu.
Ukushaya kwakhe umculo othokozelwa yibo bonke abantu kumakhele ugazi kubantu abaningi bazo zonke izinhlanga.
Ingoma yakhe esihloko sithi, “Deeper” ingenye yezingoma ezishukumise abantu ngesikhathi samaholide kazibandlela (December) kanti ibe sohlwini lwezingoma eziyishumi ebezibhekiwe ukuba zihlukanise unyaka esikhondlakhondleni somsakazo Ukhozi FM.
Kungithathe cishe amasonto amabili ukuthola ithuba lokuba nengxoxo ekhethekile nale ntokazi esanda kukhipha enye ingoma ethi “You”, nayo edlala kakhulu emsakazweni.
Ngomsombuluko le ntokazi yethweswe iziqu ze
Honours
kwiculture And Media Studies njengoba ibifunda esikhungweni semfundo ephakeme, i-university of Kwazulu Natal.
Ngesikhathi ngihlangana nale ntokazi ingamukele ngokukhulu ukumoyizela, kwaba sengathi kade saqala ukwazana. Ayipholisanga maseko ichaza ngentokozo yokuthola ithuba lokuba semahhovisi aleli phephandaba kwazise ezifundweni zayo yenze ucwaningo ngempumelelo yamaphephandaba abhala ngesizulu.
“ILANGA ngelinye lamaphephandaba engicwaninge ngalo nangempumelelo yalo esikhathini esinzima esibhekene namaphephandaba. Kuyangijabulisa ukuthi ngizoke ngibhalwe yileli phephandaba elinomlando onzulu futhi elibalulekile kubantu abazigqaja ngolimi lwesizulu,” kusho lo mculi, engeza ngokuthi uyafisa ngilubone ucwaningo lwakhe olumenze wathola lezi ziqu.
Uholly uthi unyaka owedlule kube wunyaka abematasa kakhulu ngawo njengoba ebehlanganisa izifundo kanti nengoma yakhe igile izimanga, idlalwa ubuthaphuthaphu emisakazweni nakumabonakude, waphinde wathola nokuqashwa ezindaweni ezahlukene.
“Ngemuva kokuchitha iminyaka eyishumi kulo mkhakha ngingasho ukuthi lena yingoma enkulu kwesengike ngazenza kanti okuhle wukuthi kuyona ngisebenze nomuntu ongazi kangcono, umondli Ngcobo, onekhono eliyisimanga,” kulanda yena. Uthi le ngoma ayigcinanga ngokwenza kahle eningizimu Afrika, kodwa nakwamanye amazwe angomakhelwane njengoba ethole nokumenywa ebotswana,
Zimbabwe, Angola nakwezinye izindawo.
“Ngiyafisa ukuba umculo wami uqhubeke usabalale umhlaba wonke njengoba ngisezinhlelweni zokuya elondon nasescotland,” esho.
UMCULO AKUMELE UKHETHE IBALA
U-HOLLY uzichaza njengentokazi ephila ngomculo njengoba eqale ukucula eneminyaka engu-14 ubudala kanti ngesikhathi esaqala ubecula i- afro pop kodwa manje usegxile kowe- house. Uthi kuyamjabulisa ukuthi umculo wakhe uyakwazi ukuhlanganisa izinhlanga ezahlukene nokuyinto esenhliziyweni yakhe, ukubumba izizwe.
“Umculo akumele ukhethe ibala, inqobo nje uma umnandi futhi ulaleleka, asikho isidingo sokuthi ngoba ngimhlophe ngiculele abamhlophe kuphela. Umculo yiwona owenza sihlangane sakhe iningizimu Afrika ebumbene. Angiziboni ngihlala kwelinye izwe ngaphandle kwaleli ngoba ngiyazifela ngalo namasiko ahlukene esinawo,” kusho uholly othi isizulu sakhe besiza kahle kodwa manje sisaphazamisekile njengoba esemningi egoli lapho ehlala kakhulu nabantu abakhuluma isetswana.
“Ngiyafisa ukwazi ukukhuluma inqwaba yezilimi zakuleli futhi ngibe nengoma enezinhlamvu zesizulu noma ezinye izilimi,” kusho le ntokazi ekhuluma ngezwi elipholile futhi ekhonze ukumamatheka.
Uholly uthi uma engekho matasa ukhonze kakhulu ukuzihlalela nomndeni wakhe kanti uyazifela ngonina ongumlandeli wakhe wokuqina.
“Umama wami uyikho konke kimina, ungeseke kakhulu ngesikhathi ngisaqala emculweni, wangicathulisa njengoba esaqhubeka nokweseka umculo wami,” echaza.
Uzishaya isifuba ngokwazi ukupheka kanti uthi ngolwesine ubepheke isitambu nobhontshisi. Nakuba enga
gxilile kwezemidlalo kodwa uma ethola isikhathi uzibukela ikhilikithi nebhola likanobhutshuzwayo. Uthi kumabonakude ukhonze umdlalo, i-american Gods. Unesifiso sokusebenza nabaculi okubalwa kubo uzanda Zakuza, Sho Madjozi nosimi kanti phesheya kwezilwandle uzifela ngopharrell
Williams.