Kuyolamula inkantolo kolwe-eff nomanuel

ITHI kakudikizi nqulu I-EFF ngesinqumo sowayengungqongqoshe wezemali kuleli, umnu Trevor Manuel, sokubafaka enkantolo ngezinsolo abaziveze ngaye enyangeni efile kandasa (March).

I-EFF ibimsola ngokugxambukela “nangetiye” ekuqashweni kukaEdward Kieswetter njengokhomishana omusha wesouth African Revenue Services (SARS).

I-EFF ithe lo khomishana "uyisihlobo" sikamnu Manuel futhi bano-buhlobo nangezamabhizinisi.

Umnu Manuel usola le nhlangano ngokucwasa ngobuhlanga nokumhlambalaza.

Ngeshwa umnu Manuel ubeyingxenye yethimba ebeliqoka ukhomishana benongqongqoshe wezemali utito Mboweni, njengoba sebemnamathelisa ngalokhu kwenzelela. Uthe mabalethe ubufakazi ngakho.

Umnu Manuel uqale ngokuba

nxusa laba ukuba bahoxise abebekusho ukuze angababophi.

Kabazange bakwenze lokho njengoba kuthiwa usefake isimangalo enkantolo ngokombiko wefin24.

Ngokwalo mbiko, umnu Manuel wenqabile ukuphawula. I-EFF ibhalele nomengameli wezwe ucyril Ramaphosa nomnu Mboweni, ibuza ukuthi kungani kungenziwa esidlangalaleni ukuqokwa kukakhomishana ESARS.

Okhulumela I-EFF, udkt Mbuyiseni Ndlozi utshele ifin24 ukuthi kakubethusi okwenziwa ngumnu Manuel, kabahlehli.

“Simlindele, abameli bethu baphezu kwalo lolu daba. Ngeke lesi siqhwaga siphumelele ukusivala umlomo, ikakhulukazi uma kukhulunywa ngezikhungo zomphakathi okumele sizisukumele,” kusho udkt Ndlozi.

Uthi nabo bazofaka awabo amaphepha enkantolo uma sebekulungele, benxusa umnu Manuel ukuba aphendule imibuzo abebemthumelele yona phambilini.

“Azama ukukwenza la wukushintsha into ebalulekile esiyibuzayo ukuthi kungani ukuqokwa kukakhomishana kwenziwa esithe,” kwengeza udkt Ndlozi.

zowakha@ilanganews.co.za

UMNU Trevor Manuel ofake enkantolo I-EFF emsola ngokwenzelela ekuqashweni kukakhomishana omusha wakwasars.