UCELESTE 'UNETHEMBA LOKUZITHOLELA INDODA'
UFISA ukuthola umaqondana e-united States of America (USA), usomahlaya wakuleli obuye abe ngumlingisi, njengoba enyelwe yinyoni esandleni ukuyonandisa emcimbini odumile, i-essence Festival, ezokuba ngontulikazi (July), enew Orleans & Louisiana, E-USA.
Uceleste Ntuli, odabuka empangeni, kodwa osezinze egoli ngenxa yokukhula komsebenzi, uzonandisa E-USA izinsuku ezintathu kusukela ngomhla ka-4 kuya ku-7 kuntulikazi.
Ekhuluma ohlelweni lukadj Fresh kwimetro FM ngolwesine ekuseni, uceleste uzwakalise ukujabula ngokumenywa kulo mcimbi obalwa nemikhulu kwelikaDonald Trump.
Uthe mhlawumbe uma esenandisa laphaya, uzoba nenhlanhla yokuthola umaqondana, kwazise usezame wehluleka lapha ekhaya, osekwenza ajwayele ukuzibiza ngomjendevu uma enza amahlaya.
“Ngishoshela ekuhlanganiseni iminyaka engu-40 ubudala, kodwa namanje indoda kanginayo, nginjalo nje anginayo nengane.
"Sengizame kaningi lapha kakulungi. Ngisho nasefrance lapho engangivakashele khona udadewethu, ngagcina ngokuthola i-french Kiss, kodwa kangiwutholanga usayizi wami,” kusho le ntokazi ehlale iqhulula amahlaya njalo uma ivula umlomo. Uthe hleze lolu hambo uluhlanganiselwe nguyise ongasekho emhlabeni.
“Le festival izobe igubha iminyaka ewu-25 yasungulwa, kanti phakathi kwabaculi abadumile abamenyiwe kunefrankie Beverly and Maze, okuyiqembu lomculo ubaba wami engakhula elidlala kakhulu. "Mhlawumbe nguyena ongivulele le nhlanhla, wathi mntanami hamba uyonandisa nabaculi engibathandayo,” kusho uceleste. Ngaphandle kwemaze, kuboshelwe abaculi abafana nomissy Elliot, umary J Blige, UMC Lyte, ujermaine Dupri, upharrel Williams, umusiq Soulchild, uteddy Riley, utimbaland nabanye. Uceleste akayedwa ovela kuleli oyiciko ozobe ephephezelisa ifulegi lakuleli njengoba kulandwe no-amanda Black nonasty C abangabaculi abangaconsi phansi kwabaningi ngenxa yamakhono abo. Emdlalweni isibaya uceleste ulingisa indawo yenkosikazi yokuqala kampiyakhe Zungu, usiphokazi.