Isilomo somlingisi enkingeni yemali
Sidinga u-r100 000 ukuya escotland
KUSHABALALA ithemba ngekusasa lomlingisi osematheni futhi ongaconsi kubalandeli bakhe, uthobani Nzuza olingisa indawo kamndeni emdlalweni ihostela.
Uthobani ukhala ngezindleko zokuya escotland embukisweni weEdinburgh Festival Fringe, lapho eyobonisa khona ngomdlalo wakhe weshashalazi, iboy Ntulikazi.
Uthobani uthi uma egcina ngokwehluleka ukukhokhela izindleko zokuya kulo mdlalo, kuzomele ahlawule imali elinganiselwa ku-r26 000, uma engayikhokhanga, uzovalwa ukuba yingxenye yamafilm Festival aphesheya kwezilwandle, ngoba ehluleka ukubhekana nezindleko.
“Nangonyaka odlule ngagcina ngehlulekile ukukhokha izindleko zokuhamba, bangihlawulisa u-r26 000, okwenze baphinda bangemukela futhi nakulo nyaka,” kusho uthobani.
Njengamanje uthi amathemba kuyena ayashabalala ngoba lo mdlalo njengoba ungoncwaba (August) ekubeni kumele athole u-r100
000 ukuze akwazi ukukhokhela zonke izindleko ezihlanganisa ukuthenga ithikithi lokugibela, eyokukhokhela ukungena khona kule festival, yindawo yokulala, i- visa nokunye.
Uthi njengamanje ulindele noma yiluphi usizo angaluthola ukuze akwazi ukuvikela ikusasa lakhe.
“Ngiyazicelela kosomabhizinisi noma uhulumeni ukuba banginikelele imali yokuhamba ngoba ngonyaka odlule ngagcina ngingakwazanga,” kusho uthobani.
Lo mlingisi uzakhele udumo edlala indawo kamndeni kwihostela, okuyilapho eqoqe khona inqwaba yabalandeli.
Umdlalo wakhe, iboy Ntulikazi, usuhlomule ngenqwaba yezindondo ezahlukene okubalwa Isigcawu Festival lapho athola khona ibest Actor, kwizabalaza Theatre Festival wazuza ibest Actor, Best Production nebest Playbook Publication, kwathi kwitheatre Magazine wahlabana ngebest Production, kanti kwicape Town Fringe Festival, waklonyeliswa ngebest Performance.