SEKUSUKE OMKHULU UMSINDO NGAMA-GQOM AWARDS
SEKUSUKE omkhulu umsindo ngomcimbi wamagqom Awards, ozokwenzeka okokuqala ngqa kulo nyaka njengoba uhlelelwe ukuba ngomgqibelo ebusuku E-ICC, ethekwini.
Umnikazi wendawo kashisanyama, imashampulane’s Shisanyama, umnu Bonga Shange ( osesithombeni), odume ngomy Man, ukhala ezimathonsi ngalo mcimbi. Uthi uvalela ngaphandle izindawo zasemalokishini okuyizona ezidlala kakhulu umculo we' gqom'.
Umnu Shange utshele ILANGA Langesonto ukuthi kuyamhlukumeza ukuzwa ukuthi abahleli balo mcimbi kabanazo izinhlelo zokuya kubona njengabanikazi bezindawo ezeseka kakhulu lo mculo, ngokuwudlalela izihambeli zabo.
Ugcizelela ukuthi yizindawo zabo ezikhulisa lolu hlobo lomculo, kodwa uma usuthola izicoco, bona bashiywa ngaphandle.
“Kangikhulumeli indawo yami nje kuphela, kodwa zonke lezi zindawo ezisemalokishini. Phela yizona ezikwazi ukukhulisa abadidiyeli nodj abadlala lo mculo bengakaziwa. Thina kasidingi ukuba uze ube negama ukuze udlale ezindaweni zethu, kodwa uma sikubona ukuthi unekhono siyakunika ithuba uzithuthukise. Yingakho ngikhala kangaka nje uma sebesikhohlwa, kodwa bebe bekhuliswe yithina,” kusho umnu Shange.
Ubebhodla umlilo ngesikhathi ekhuluma nentatheli. Uthe okunye okumephula umoya, wukuthi ngesonto eledlule kwenziwe umcimbi wokumaketha amaGqom Awards endaweni yabelungu, imcdonald B&B, ethekwini.
“Leya ndawo kayiwudlali ngisho umculo, yindawo yokulala nje, kodwa bashiye thina bakhetha ukuyokwenza umcimbi endaweni yokulala,” ebalisa.
Uveze nokuthi uzwe kuthiwa kunomkhakha webest Gqom Venue, konke lokho athe kuyabahlukumeza.
Umnu Thabo Ramokoena, ongomunye wabahleli balo mcimbi, uyihlabe wayihlikiza inkulumo kashange, wathi kumele bafunde ukulinda.
“Abantu kumele bakuqonde ukuthi emicimbini efana nalena, kuyenzeka kube khona abahlonishwayo ngegalelo labo, ngaphandle kokuqokwa ukuba bancintisane nabanye abantu.
"Mhlawumbe ushange ukhuluma kanjena nje, kune- email esendleleni,” kusho umnu Ramokoena. Uphinde wathi kusengokokuqala kwenzeka umcimbi, ngakho-ke imibono esuka emphakathini izobasiza kakhulu ukuwukhulisa ngonyaka ozayo.
Uthe umkhakha we-best Gqom Venue kabanawo, wathi kodwa ngoba sekuyakhulunywa ngawo, bazobona noma bayawufaka yini ngonyaka ozayo.
Umnu Ramokoena uthi izicelo zokungenela zaziwu-556, okutshengisa isasasa lalo mcimbi. Kulo mcimbi kulindeleke ukuba kushe igqom kusuka uqala kuze kuba uyaphela.