"NABEFUNDISI BAYAKUDINGA UKUFUSWA NGENTUTHU"
SESIFIKILE leso sikhathi esibalulekile kuwo wonke amakrestu emhlabeni jikelele lapho inkosi ujesu yadela konke ngenxa yezono zabantu yabethelwa emnqamulezweni ukuze abantu basindiswe.
Isikhathi somkhosi wephasika emakholweni siyimvuselelo nakulabo abasuke sebelahlekelwe yithemba empilweni ngezimo ezisuke zibakhungethe.
Kula masonto adlule abantu basolundi bezwe inkonzo ebivutha amalangabi emfihlweni kaNdlunkulu Irene (Mamzila) Buthelezi lapho umfu Canon Mbatha wasesheshi ( osesithombeni), eveze khona amandla esiphambano.
Uqale ngokuchaza imbewu itshalwa emhlabathini, ibola bese iveza isithelo. Wabe esethi omame emakhaya bayaye bavune ummbila, bawufake enqolobaneni kuthi kusenjalo leyo mbewu ithuthwe enqolobaneni ngoba bebalekela ukuba ingadliwa yizilokazane nokuthi futhi ingonakali, bayibophele phezulu emshayweni, phezulu ukuba ifuswe yintuthu ukuze iphephe.
Umfu Mbatha uqhubeke wathi nojesu wathi elenga esiphambanweni, ephahlwe ngabaphangi ababili, omunye embhinqa ethi makazikhulule njengoba eyindodana kankulunkulu, kepha omunye wamkhuza, emkhumbuza ukuthi ujesu akonanga lutho kepha bona bonile, wabe esezicelela umphangi ukuba inkosi ize ibe naye epharadesi.
“Ukuba kwabe kuyimi, umuntu engebele izinkomo zami, engumphangi, ngangingeke ngithi namuhla ngizobe nginawe epharadesi. Kodwa ujesu akabalanga ububi bomphangi, wamthwesa umqhele ngaso leso sikhathi.
“Baningi abazalwane abadinga ukufuswa ngentuthu ukuze bangadliwa yizilokazane, ngisho abefundisi imbala. Kayikho indawo edlula ukuba abantu baye emshayweni emphelandaba esiphambanweni, nomndeni wakwabuthelezi siwukhomba khona emshayweni lapho kukhona ukuphila nokududuzeka kweqiniso,” kusho umfu Mbatha.
Bayakhunjuzwa abazalwane njengoba bethatha uhambo lokuyohlangana ezindaweni abahlangana kuzo beyodumisa inkosi ukuba baqaphele lokhu okulandelayo:
* Izingozi emigwaqweni. * Bangalayishi ngokweqile. * Bangashayeli ngesivinini. * Baphumule, bangashayeli noma sebekhathele.
* Bazihloniphe uma bechitha amanzi emigwaqweni, abantu bangaboni izimanga.
* Bangasusi izimpi nemibango emabandleni ngenxa yemali.
* Uma kukhethwa izikhundla, asebephelelwe yisikhathi bangabi nomhobholo wokungafuni ukugudluka ezikhundleni.
* Intsha iziphathe kahle ingalingwa yinyama enkonzweni.
* Izethembiso zemishado azande.
* Akukhunjulwe ukuthi ujesu wafa wavuka wenyukela ezulwini, angabuya noma yinini abantu, abahlale belindile beziqoqile.