Ukhuthaza imfundo umahlangu
UGQUGQUZELA intsha ukuba ihambise imfundo phambili usiphiwe Mahlangu ongumdlali wehighlands Park engomakoti kwi-absa Premiership.
Umahlangu ungowokuzalwa eleslie, empumalanga. Uzalwe mhla ka-9 kumbasa (April) ngo1995.
Ufunde amabanga aphansi empumelelo Primary School ngaphambi kokudlulela echief Ampi Secondary nokuyilapho ephothule khona umatikuletsheni.
Uqale ukudlala ibhola esemncane ezitaladini zangakubo nokuyilapho egcine engenwa uthando lukanobhutshuzwayo.
Ngenkathi ephuma esikoleni, ucele izibusiso kubazali bakhe nebala bakwazi ukumvumela ukuba aqhubeke nebhola.
Ukwenza kahle kwakhe kumdonsele iso labaqeqeshi besikhungo sokudlala ibhola esaziwa ngevaal Academy.
Emuva kwalokho ube esehambela ama-trials kwihighlands Park. Ukushaya kwakhe into ecokeme yikhona okudale ukuba asayine kule kilabhu.
Nokho ufike izinto zimapeketwane kwazise le kilabhu yase igawulwe yizembe nokwaphoqelela ukuba aye nayo ehlathini kwinational First Division (NFD).
Umahlangu ufike kwazwakala kwinfd njengoba efike waqobela amagoli angu-7 ngesizini yakhe yokuqala nokusize le kilabhu yabuyela kwipremiership ngokushesha.
Ukwenza kahle kwakhe kuholele ekutheni anqobe umklomelo womdlali omncane othembisayo ngesizini yakhe yokuqala ekule kilabhu.
Lo mdlali ungomunye abayingcosana abakwaze ukuhambisa imfundo phambili ngaphambi kukanobhutshuzwayo.
Umahlangu uthi ufisa abafana abasakhula bahambise imfundo phambili ngoba ibhola liyinto yesikhashana. Uthi angakujabulela ukulekelela intsha enesifiso sokudlala ibhola elikhokhelwayo kwazise ukholwa ukuthi ithalente liningi kakhulu kuleli lizwe inkinga nje ukuthi alivundululwa.
Uthi kumsizile ukudlala isikhathi eside emabangeni aphansi njengoba efike esevuthiwe esigabeni esikhulu. Lo mdlali udlalele IR.E.S.A, ithirsle Groove ne-evander Real Aces esigabeni sama-amesha.
Uthi ziyasiza kakhulu izikhungo zokuthuthukiswa kwabadlali kuleli ngoba zenza abadlali bafike sebevuthiwe esigabeni esikhokhelwayo.
Ingxoxo kamahlangu NELANGA Langesonto ( I/ L) yangaphandle kwenkundla ihambe kanje.
I/ L: Ngabe ukhule ungumuntu onjani?
Mahlangu: Ngikhule ngiyingane ekahle kwazise awekho amacala abazali bami abawaqule ngami, bengiqikelela kukho konke ebengikwenza ngoba ngisaba ukubaphoxa.
I/ L: Ukhulele ekhaya elinjani?
Mahlangu: Ngikhulele emndenini okholwayo. Ngikhuliswe umama obeyikho konke kimi kwazise ubengikhulisa ngobuqotho. Bengithi noma ngonile angijezise. Ngikhumbula ngelinye ilanga ngilahle imali wangibamba ngoswazi saze sayofika enkundleni esasidlala kuyo nalapho esafika sayithola khona.
I/ L: Nibangaki kwenu?
Mahlangu: Sibawu-7 sesisonke iwele lami nguSipho, udadewethu usibongile, ulindiwe, ujunior, umelokuhle nomagcino wakwethu unokwanda.
I/ L: Ngabe uyakwazi ukupheka?
Mahlangu: Ngiyinkunzi makuziwa ngalapho kwazise ngikhule ekhaya ngipheka. Kungisize kakhulu nokukwazi ukuziphekela njengoba ngizihlalela ngedwa.
I/ L: Hlobo luni lokudla olukhonzile ?
Mahlangu: Ngikhonze kakhulu ipapa nenyama yenkomo noma ngizidlele idombolo nobhontshisi
I/ L: Ngabe ukhona ohlekisana naye?
Mahlangu: Ngizocela ukungawuphenduli lowo mbuzo okwamanje ngiyokuphendula ngelinye ilanga.
I/ L: Abantwana bona unabo?
Mahlangu: Lutho bengingakabi nabo okwamanje.
I/ L: Ngabe ikhona incwadi oyifundayo?
Mahlangu: Cha, ibingakabi bikho okwamanje.
I/ L: Hlobo luni lomculo olukhonzile?
Mahlangu: Ngithanda kakhulu owokholo kwazise ngiwumuntu okholwa kakhulu noma ngivuka ekuseni ngivuka ngawo.
I/ L: Ngabe lukhona uhlelo lukamabonakude olukhonzile?
Mahlangu: Ngithanda kakhulu igenerations kanye nesibaya.
I/ L: Hlobo luni lukamakhalekhukhwini oluphathayo?
Mahlangu: Ngiphatha i-iphone 6.
II/ L: Yimuphi umbala owukhonzile?
Mahlangu: Ngikhonze kakhulu omnyama.
I/ L: Yini oqala ngokuyenza uma uvuka ekuseni?
Mahlangu: Ngiyathandaza ngibonge ukuphila ngaphambi kokuba ngiqale ukwenza ezinye izinto.
I/ L: Njengamanje utshabaza ngamotoni?
Mahlangu: Angikabi nayo.
I/ L: Iliphi iqembu okhule ulithanda kuleli naphesheya kwezilwandle?
Mahlangu: Kuleli ngikhule ngithanda i-orlando Pirates kanti phesheya kwezilwandle ngizifela ngechelsea kanye NEPSG.
I/ L: Yisiphi isipho osuke wasipha abazali bakho?
Mahlangu: Kuningi kakhulu esengikwenzile ngibonga indlela abangikhulise ngayo.
I/ L: Yiliphi izwe ofisa ukulivakashela phesheya kwezilwandle?
Mahlangu: Ngithanda ukuya efrance ngichazwa ubuhle bamadolob- ha akhona.
I/ L: Hlobo luni lwesiqholo osisebenzisayo?
Mahlangu: Ngisebenzisa i-savi Bior
I/ L: Usichitha kanjani isikhathi mawungekho matasa?
Mahlangu: Ngiyaye ngivakashele umndeni wami noma ngiziyele ezitolo.
I/ L: Yimalini osuke wayibhubhudla ngobusuku obubodwa nabangani bakho?
Mahlangu: Angisiye umuntu okhonze ukumosha imali ngiyaye ngiqikelele kwengikwenzayo.
I/ L: Uzibona ukuphi eminyakeni emihlanu ezayo?
Mahlangu: Njengawo wonke umdlali nami ngiyafisa ukudlala phesheya kwezilwandle.
I/ L: Ungabaluleka kanjani abafana abafisa ukuhamba ezinyathelweni zakho?
Mahlangu: Umuntu kufanele asebenze kanzima angavumi ukukhohliseka kalula. Akufanele bajahe utshwala namantomba