IYAVUTHWA EBHEKE EHLATHINI KWI-MARITZBURG UNITED
IYAVUTHWA indlela ebheke ehlathini kwimaritzburg United njengoba iguqiswe yihighlands Park ngo-1-0 emdlalweni we-absa Premiership izolo ngomgqibelo ntambama, emakhulong Stadium, egoli.
Iteam of Choice idonsa kanzima ukuxaxama emsileni njengoba inamaphuzu angu-20 emidlalweni engu-26.
Igoli lehighlands elwela ukungena kwi- top 8, livalelwe nguPeter Shalulile ngomzuzu ka-77.
Imaritzburg bekumele iwunqobe lo mdlalo kwazise ichippa United (nayo evika izembe) ihlulwe yibidvest Wits ngo-1-0 ngolwesihlanu.
Izinto zithanda ukuba wumqansa kwiteam of Choice njengoba isalelwe yimidlalo emine, ebukeka inzima kakhulu kuyona.
Emdlalweni olandelayo, izodudulana ne-orlando Pirates - esembangweni wesicoco seligi - ekhaya mhla ka-24 kwephezulu, kanti ngemuva kwalokho izovakashela iblack Leopards bese yamukela isupersport United kuthi kowokugcina ibhekane nebaroka ekuhambeni.
Usizi ngathi lusazoqhubeka nokugadla emgungundlovu njengoba ipirates ilwela ukunqoba iligi, ekubeni akuphumi noma ngubani kwileopards njengoba abantu basethohoyandou benguzuka ngobuningi emidlalweni yale kilabhu yasekhaya.
Ikaizer Chiefs ijuluke kanzima ibhekene nayo ileopards kowePremiership izolo ntambama emdlalweni ophele zibambene ngo-11 khona ethohoyandou.
Le nkundla ibigcwele phama, futhi abantu baze bama ngezinyawo ngenxa yokugcwala kakhulu kwenkundla.
Igoli lechiefs kulo mdlalo livalelwe ngu-arohasina Andrianarimanana ngomzuzu ka-10 kwathi eleleopards lashaywa ngulifa Hlongwane ngoka-22.
Uhlongwane ugcine eqokwe njengomdlali ovelele kulo mdlalo.
Ernst Middendorp ololonga ichiefs, ubevele eshilo ukuthi ulindele ubunzima ethohoyandou, ngenxa yokungquzuka komphakathi wakuleya ndawo emidlalweni yeleopards yasekhaya.
Abalandeli beleopards bacindezele ipirates ikhishwa yile kilabhu kwinedbank Cup.
Ibucs ibibhekene nefree State Stars kowepremiership izolo kusihlwa esoweto.
Lona bekungumdlalo wokuqala westars selokhu ishiywe ngusinethemba Jantjie odlule emhlabeni ngemuva kwengozi yemoto emehlele efree State.