Isantaco nembangela yokufa kosomatekisi
Ubungozi ngemali egaywayo yibona obuhamba phambili
UMKHONTO ubhajwe enxebeni embonini yamatekisi, njengoba sekusocongwe osomatekisi abangaphezulu kuka-7 esikhathini esingaphansi kwezinyanga ezintathu Kwazulu-natal.
ILANGA Langesonto NELANGA, libikile ngezinye zezehlakalo zokubulawa kwabo, njengoba iningi labo belidutshulwa ngokulalelwa unyendle.
Phakathi kwasebebulewe esikhathini esingaphansi kwezinyanga ezintathu, singabala u-andile Hlela, usiya Phiri, uzamani Simamane, usibusiso “Boy” Shazi, ( osesithombeni), unicolas Ntuli, ubongani Mthembu nomhlaba Thabethe ukukha nje phezulu.
Kuzona zonke lezi zehlakalo, akwaziwa ukuthi yini imbangela yalokhu kuhlasela. Muva nje isouth African National Taxi Council (SANTACO), ibambe umhlangano waminyaka yonke edundee, kanti kalusalanga lolu daba lokungqubuzana okubonakala kungalawuleki kule mboni ethathwa njengeyabampisholo.
ILANGA Langesonto lixhumane nosifiso Shangase oyi-provincial Manager YESANTACO KwazuluNatal, ukuzwa ilaka labo ngalesi sihlava. Uthe indaba yokubulawa kosomatekisi, ibakhathaza kakhulu. Nokho uthi zikhona izinhlelo abanazo ukuzama ukuletha uzinzo kule mboni.
Phakathi kwezinto athi zibakhathaza kakhulu nezidingidwe emhlanganweni, yindaba yezimvume, wumona ohlasele kule mboni nokudlova okuningi okuhambisana nobugebengu.
Uthi umona embonini uqala lapho amalungu kasoseshini owodwa, esebona ukuthi umsebenzi wokuthutha abantu uyancipha, bese beqala ukufisa ukuba kube namatekisi amiswayo, ukuze kuthuthe ambalwa.
“Kusuka lapho-ke ukuxabana kusoseshini, bese kufa abantu,” kusho umnu Shangase.
Uqhube wathi indaba yezimvume ezilawula ukuba itekisi ilayishe endaweni ethile kuphela, nazo ziyephulwa, uthole itekisi yehlisa iphinde ilayishe emzileni engavunyelwe kuwona.
“Bavele bafune ukwehlisa maqede balayishe futhi, bese iyaqala-ke inkinga,” kusho umnu Shangase. Uthe enye inkinga ekhona kule mboni, ngeyonogada abafika bezolekelela uma kunesimo esibucayi kusoseshini, okuthi uma leso simo sesidlulile, sekumele bamiswe, bese besusa udungunyana.
“Labo nogada bakhokhelwa ngokuba kukolekwe imali ematekisini alowo soseshini. Lokhu kugcina sekubacasula abanye osomatekisi, bese becela ukuba bahoxiswe onogoda okanye benqabe ukukhokha le mali.
"Ngenxa yokuphikisana okuba khona, kujika amanye amalungu kasoseshini ayotshela onogada ukuthi ngusibanibani ongasabadingi, nguyena owenqaba nomsebenzi, bese inzondo iqala lapho,” kusho umnu Shangase.
Uqhube wathi zikhona izinhlelo abanazo ukuzama ukudambisa isimo, njengoba ukubumba ikomidi elizobheka ngokujulile ukuthi umuntu ofuna ukungena embonini ngabe ukulungele yini lokho, kucwaningisiswe imuva lakhe, kuphinde kube nemikhuleko.
Uthe kunohlelo lokusayinwa kwe- affidavit olwenziwa ngumuntu osuke efuna ukusebenza embonini, nokho uthi osomatekisi bayaligcwalisa leli fomu, kodwa uma sekuthiwa malicutshungulwe, bakhale ngokuthi baqedelwa isinkwa. Leli fomu kusuke kuhloswe ngalo ukuthola ukuthi umuntu awekho yini amacala abucayi ake wathinteka kuwona.
Enye into ISANTACO efisa ukuyenza, wukuba inkampani yonogada ifakwe ngaphansi kukahulumeni ukuze kugwemeke ukushintshisana ngemali. Kuzokhumbuleka ukuthi ISANTACO iqoke ithimba elibizwa ngetask Team, ukubhekana nezinkinga kule mboni.
Leli phephandaba likhulume nanomnu Themba Kubheka onguNobhala wegreater North Region, othe bakhona abantu asebeshayiwe kuleya ndawo, kodwa wathi kasikho isiqiniseko sokuthi kusuke kuhlobene nomsebenzi wokuthutha ngoba ukuba kunjalo, ngabe sebebikele umnyango.
Bafuna ukwehlisa bese beyalayisha, iqale kanjalo inkinga kososeshini.