Igcokama Elisha liphika 'eyocansi'
Lithi yizikhohlakali ezihumushe ukuthanda kwazo
ISILOMO somculi kamasikandi, umthandeni “igcokama Elisha” Manqele sibabize ngezikhohlakali abayamanisa isihloko se-albhamu yaso entsha, nezocansi.
Lesi silomo sisuse umsindo ngolwesine kuvela emphakathini isihloko se-albhamu yaso entsha esithi: "Dog Style". Lesi sihloko sinyakazise inkundla yezokuxhumana, i-instagram.
Iningi labalandeli balesi sihlabani, bebeyamanisa lesi sihloko nesitayela esidume ‘ngelenkomoziyophuza’, abanye bebesihlaziya ngendlela yabo.
Likhuluma NELANGA Langesonto igcokama Elisha, lithe abalandeli balo bayazi ukuthi amaalbhamu alo livame ukuwaqamba izihloko zesingisi. Lithi nakulena kakukho okwethusayo, ngoba uma kutolikelwa esizulwini idog Style, kusho ukuthi isitayela senja noma sezinja.
“Njengoba abantu benemikhuba yabo, kanjalo nezilwane zineyazo. Kuwumkhuba wenja ukungabongi. Omunye umkhuba wenja wukuthanda ukukhonkotha imoto ehambayo,” lichaza.
Lithi kuya
lixaka ukuthi kungani abantu bafikelwa wumcabango othinta ucansi kulesi sihloko.
“Thina esikhulele emakhaya, yinto esiyifundiswayo ukungayisho into ehlambalazayo phambi kwabantu abadala. Kungaba yichilo nje ukuba ngikhulume into ewukungcola. Ngabe ngingcolisa igama lasemzini engiphuma kuwona,” kusho igcokama. Lithi abantu kuzobasiza ukuba bathenge umculo walo ukuze bezozizwela ukuthi likhuluma ngani. Lithi kayikho ngisho into eyodwa ehlambalazayo emculweni walo. “Mina ngiyiciko, uma ngibhala ngiyacikoza. Uma ucikoza-ke into kawuyibeki obala, iba nomqondo ocashile, okuyinto engiyenze kule albhamu. Abantu bazothola (ukuthi ukhuluma ngani) uma sebelalele i-albhamu,” kusho lona. Lithi abangakayitholi le albhamu mabalindele isitayela esehlukile kunalesi abasejwayele. “Ngiphethe ushuni ongajwayelekile, ngingumuntu othandayo ukuzama izinto ezahlukene emculweni, ukuze kubonakale ikhono lami. Yinto engiqalayo ukuyenza, ngiveze amakhono amaningi. Ngingasho nje ukuthi bengifihle induku emqubeni kule albhamu. "Phela kuningi engikwenzayo ngephimbo lami,” kuphetha igcokama. Izolo ohlelweni usigiya Ngengoma, abasakazi balo, ukhathide “Tshathugodo” Ngobe nozimiphi “Zimdollar” Biyela behlulekile ukubiza isihloko sale albhamu emoyeni, njengoba bebelokhu bethi isitayela uma bekhuluma ngayo.
Lapha bese kuyisigatshana lapho besuke bekhuluma khona ngamaalbhamu amasha.