ULINDE UNYAKA WONKE ESEQASHWE KWIMBEWU
KUZOSHINTSHA ukwenza emdlalweni Imbewu: The Seed esontweni eliqala kusasa njengoba kuzotheleka umlisa omusha ozohlenga ungcolosi (Tony Kgoroge) nomazulu (Leleti Khumalo) esigamekweni sokudunwa emuva komemulo kazakithi (Nokubonga Khuzwayo) osematheni kulezi zinsuku.
Abalandeli balo mdlalo babonile ungcolosi exwayiswa yinyanga ngengozi alengela kuyo nomndeni wakhe. Ngolwesibili kuzothushuka umlingisi omusha unkululeko (Nkanyiso Mchunu).
Okuzogqama maduzane wukuthi naye unolwakhe utaku, ubalekela impilo yakhe yaphambilini, azama ngayo yonke indlela ukuthi ibe yimfihlo.
Emuva kokubahlenga, uba yintandokazi kungcolosi aze amqashe enkampanini yakhe imaluju Oil, ukuzoba yinhloko yezokuphepha.
Abalandeli bomdlalo bayazi ukuthi selokhu kuboshwe uphunyuka (Ngqopho Nombela), akekho ovale isikhala sakhe kulo msebenzi. Uzoqala ukubonakala ngolwesibili lo Nkululeko ophenduka isethenjwa sikangcolosi.
Ephawula umchunu ngokuthola leli thuba kwimbewu, uthi nakuba aze ngo-2017 ukuthi usitholile lesi sikhala kodwa kudingeke alinde izinyanga eziwu-12 besahlela ababhali ngazongena akwenze.
“Yithuba elikhulu kakhulu leli lokujoyina imbewu emsebenzini wami. Ukulinda ababhali kunginike ithuba lokuqondisisa kahle abanye abalingiswa.
“Ukungena kulo mdlalo okhula nsuku zonke kuyangithobisa kanti nokusebenza nabantu abanekhono elingaka kule mboni kuwukufezeka kwephupho,” usho kanje esitatimendeni.
Imbewu: The Seed ikhonjiswa nsuku zonke phakathi nesonto kugamenxe ihora lesi-9 kusihlwa. Okulindelekile-ke yilezi mfihlo anazo ukuthi zizowaphendula kanjani amatafula.