Zisazoqina ezokuphepha EKZN
Bajabule ngokwehla kwesibalo sezingozi ngephasika
AZOQHUBEKA nokukanisa kuzona zonke izinkalo amaphoyisa omgwaqo ukuzama ukulwisana nokuziphatha budlabha kwabashayeli emigwaqweni yakwazuluNatal njengoba kuyimpelasonto ende yephasika.
Lokhu kushiwo ngumnu Kwanele Ncalane, okhulumela umnyango wezokuthutha Kwazulu-natal, emuva kokuba sehle kakhulu isibalo sabafe ezingozini zomgwaqo ezinsukwini zokuqala zala maholidi.
Umnu Ncalane uthe ungqongqoshe wezokuthutha, umnu Mxolisi Kaunda ( osesithombeni) , usagculisekile ngombiko aba
sawutholile okwamanje ngezingozi zomgwaqo esifundazweni.
Uthi izingozi ziphansi uma kuqhathaniswa nezesikhathi esifanayo nyakenye. Uthe zimbili izingozi ebezisenzeke kulesi sifundazwe ngaphambi kwentambama yayizolo ngomgqibelo.
Uthe lezi zingozi zidlule nemiphefumulo yabantu abawu-10. Eyokuqala yenzeke enewcastle, lapho kushayisane khona amaloli amabili, imoto encane netekisi emgwaqweni u-n11, kwashona abantu abawu-5.
Enye yenzeke empangeni emgwaqweni u-r102 nakhona kwashona abantu abawu-5. Kuzo zombili lezi zingozi basalinde umbiko ophelele ukuthi ngabe kube yini imbangela yazo.
Umnu Ncalane uthe bangaphezulu kuka-20 abashayeli ababoshiwe ezingxenyeni ezahlukene zesifundazwe ngenxa yamacala okutholakala beshayela bengekho esimeni, abanye beqise uphuzo oludakayo.
Uthe umnyango wenze inqwaba yezinhlelo ukulungiselela iphasika, kubalwa ukuhlangana kukaMnu Kaunda namaphoyisa ukudingida ngezinselelo zomgwaqo.
Okunye athi bakubheke ngabomvu yimiphumela yezivimbamgwaqo, ukuthi uma ubanjwe uphambene nomthetho yini okumele yenziwe ngawe.
Ukuqinisekisile ukuthi amaphoyisa atshalwe kuzona zonke izinkalo kuze kube wulwesibili abantu sebebuyela emisebenzini.