Kushayeke abamasama ngohlelo LWESABC
I-SABC ithi isayicubungula eyokubuyisa ilive Amp
KUGADLE kabi kubahleli bomcimbi wokuklomelisa abaculi bakuleli, weSouth African Music Awards (Sama) ukungabi bikho emoyeni kohlelo lomculo oludumile kumabonakude, ilive AMP, olukhonjiswa KWISABC 1 njalo ngolwesihlanu.
Lolu hlelo, oseludlala iziqephu ezindala kulezi zinsuku, lushayelwa ngudj Lamiez nospeedsta.
Sekuphele cishe amasonto amathathu lolu hlelo lukhombisa iziqephu zakudala, ekubeni lujwayele ukukhonjiswa bukhoma.
Ngokuthola KWELANGA LangeSonto, ISABC isezinhlelweni zokulubuyisa lolu hlelo, kodwa kakucaci ukuthi luzobuya nini.
Ukungakhonjiswa kwalo bukhoma, kuthikameza izinhlelo zabamasama njengoba ngolwesine kuzomenyezelwa abaqokiwe kanti ngolwesihlanu bekulindeleke ukuba kumenyezelwe bukhoma umunxa werecord of the Year kulolu hlelo.
Unhlanhla Sibisi, oyisikhulu esiphezulu kwisama, uthe bayakuqonda ukuthi lolu hlelo kalukho emoyeni kulezi zinsuku. Uthe basezingxoxweni NESABC mayelana nokuthi bazokwenza kanjani ukumemezela lo munxa ovotelwa ngabantu kwisama.
“Okwamanje sisabonisana neSABC ngokuzokwenzeka mayelana nokumenyezelwa komunxa weRecord of the Year. Sizozama ukuziphothula izingxoxo zethu ngaphambi kokuba kushaye usuku lokumenyezelwa kwalo munxa,” kusho usibisi.
Minyaka yonke umunxa werecord of the Year uhlale umenyezelwa kulolu hlelo bukhoma njengoba kungacaci ngokuzokwenzeka kulo nyaka.
Okhulumela ISABC, uvuyo Mthembu, uthe okwamanje basezinhlelweni zokubuyekeza ukubuyisa lolu hlelo. Uthi maduze
bazomemezela ukuthi luzobuyela nini emoyeni neziqephu ezintsha. Ukuphikile ukuthi lolu hlelo ludlala iziqephu ezindala ngenxa yokuntula imali kwale nhlangano yezokusakaza.
Uthe zonke izinhlelo ezikhonjiswa KWISABC baqale bazicubungulisise ngaphambi kokuthathwa kwesinqumo sokuzibuyisa, ngakho ne-live AMP ingena ngaphansi kwalolu hlelo lwabo. Uthe maduze iziteshi zikamabonakude ezingaphansi kwabo zizomemezela ngezinhlelo abanazo njengoba kuqala unyaka omusha wemali.
“Sinxusa umphakathi ukuba uqhubeke nokubuka iziteshi zethu njengoba kukuningi okusha okuzayo abazokuthokozela,” ephetha.
Khonamanjalo, babambe umoya abaculi njengoba kuzomenyezelwa abaqokiwe kowesama ngoLwesine emcimbini ozobe useAlberton City Hall, egoli.
Lo mcimbi uzobe ugubha iminyaka ewu-25 wasungulwa.
lucky.cain@ilanganews.co.za