ABEZEPOLITIKI BEBEGAYA IVOTI NGEPHASIKA

IZIGIDI zabantu baseningizimu Afrika zibungaze ukuqala kwempelasonto yephasika ngokuhambela izinhlelo zamabandla azo ngolwesihlanu.

Lokhu kunike inqwaba yosopolitiki ithuba lokusabalala kula mabandla ngenhloso yokunxenxa amavoti njengoba kuza ukhetho lukazwelonke olungomhla ka-8 kunhlaba (May).

Umengameli wezwe, umnu Cyril Ramaphosa ( osesithombeni), uhambele ibandla lamaweseli eport Shepstone lapho bekunezinkulungwane zamalungu aleli bandla.

Umnu Ramaphosa uphinde wathola nethuba lokuthandazelwa ngabefundisi baleli bandla. Esekhuluma, unxuse amalungu ukuba aphume ngobuningi ukuyovota.

Umholi weda umnu Mmusi Maimane, uhambele ichristian Revival Centre ethekwini. Umnu Maimane ufisele bonke abantu bakuleli iphasika elinezibusiso nokuphepha. Ubuholi obuphezulu BE-EFF buhambele igrace Bible Church, esoweto.

Ebandleni, I-ethekwini Community Church, eliholwa ngumbhishobhi Vusi Dube, bekunabaholi abehlukene okubalwa kubona umnu Zwakele Mncwango ohola IDA Kwazulu-natal, umnu Mdumiseni Ntuli ongunobhala weANC kulesi sifundazwe, umnu Bheki Ntuli ongunobhala waleli qembu esifundeni itheku, umnu Mdu Manana, nonkk Nocawe Mafu abasesigungwini esiphezulu seqembu elibusayo.

Umnu Mncwango ekhuluma kuleli bandla, unxuse ukuba abaholi bahloniphe umphakathi njengoba kuyiwona obavotela ezikhundleni.

Uphinde wacela ukuba amalungu ebandla abakhulekele njengoba bebhekene nezinselelo zokuhola. Unkk Mafu ukhulume ngeqembu elibusayo wakhumbuza amalungu ebandla ukuthi umhlangano wokuqala WE-ANC wabanjelwa esontweni ebloemfontein.

Uchaze leli qembu njengelakhelwe ngaphansi kwesisekelo sikankulunkulu.