Owozalo usengena shi kwezobuhle bemfashini
USEZINHLELWENI zokungena shi kwezobuhle nezemfashini, umlingisi kamabonakude ophinde abe ngumsakazi, ukhaya Dladla, ozakhele olukhulu udumo engugc emdlalweni uzalo, okhonjiswa ngomsombuluko kuya kuLwesihlanu ngo-20h30 KWISABC 1.
Kuleli viki lesi silomo sigabise ngomkhiqizo waso wamateki ezinga eliphezulu, elebuli i-ekhaya. Uphinde waveza ukuthi akazukugcina ngawo, kodwa usezinhlelweni zokwenza izikhwama, izicathulo zabesifazane ezingama- stilettos neziqholo imbala.
La mateki anemihlobiso engama- spikes, kanti aphinde abe nemibhalo esakubingelela, elotshwe ngezilimi ezahlukene kubalwa "usawubona, avuxeni, molweni” nezinye izilimi.
Uthe atholakala ngazo zonke izilimi ezisemthethweni, kodwa okwamanje basakhiqiza kuphela ngokwezicelo zabathengi.
Uma echaza nge-ekhaya, okuyilebuli engaphansi kwenkampani yakhe, ikhaya Entertainment Guru, uthe angawabantu ababeka phambili ubuntofontofo, isitayela esiphambili nobuhle.
“Bengifuna uhlobo oluthile lomkhiqizo.
"Nokho ngehluleke ngancama ukuthola abakhiqizi baseningizimu Afrika engingasebenzisana nabo. Emuva kocwaningo olunzulu, ngigcine ngithole abaseturkey, okuyibona engisebenzisana nabo,” esho.
Uthi lunzulu ucwaningo alwenzile kusukela ekukhetheni indwangu kuya emihlobisweni yawo nokunye.
Uthi imumangazile indlela
umkhiqizo wakhe owemukelwe ngayo kangangoba osaziwayo okubalwa kubona usomizi, umculi udladla Mshunqisi nomlingisi ubaby Cele, ngabanye abaphumele obala bencoma umsebenzi wakhe omuhle.
Uthe lesi kuseyisiqalo sephupho lakhe lokuba sendimeni yezobuhle nemfashini.
“Ngisebenzisana nethimba elinentshisekelo efana neyami. Yingakho kumanje simatasa ngezinye izinhlelo esingangena kuzona okubalwa iziqholo, izikhwama nezicathulo.
"Ngalokhu akusho ukuthi ngeke ngisaqhubeka nemisebenzi abaningi abangaze ngayo njengokuba ngumlingisi nomsakazi.
Empilweni ngifundile ukuthi ukuze ukhule kumele uphilisane futhi ubambisane nabantu ngoba akekho umuntu oyihlane,” esho.
Okwamanje uthe la mateki atholakala ngokuwa-oda online.
ayandab@ilanganews.co.za