Ukulondolozwa kwezilimi zomdabu
EZINSUKWINI ezingezingaki ezedlule kuke kwavela umbiko obuyithela ngamanzi abandayo indaba yokukhuthazwa kokusetshenziswa kwezilimi zomdabu ezikhungweni zemfundo ephakeme zakuleli, ikakhulukazi e-university of Kwazulu-natal okuyiyona ebithinteka kulolu daba.
Nokho inhloso yalolu daba kakusikhona ukwahlulela ukuthi umfutho oluza ngayo uphiko lwezilimi kule nyuvesi luthatha ngamawala yini noma qha maqondana nale ndikimba.
Inkulumo-mpikiswano ngokuthi ulimi lwesizulu seluthuthuke ngokwanele yini ukuba kwenziwe konke ngalo, wudaba lwangolunye usuku.
Okuzanywayo lapha wukuba sithi singakafiki lapho, nokho silonde lokho okusekhona endleleni okusetshenziswa ngayo izilimi zethu, okungasho ukuthi kumelene nephupho elihle lokuba izilimi zomdabu zinikwe inhlonipho kanye nabanikazi abawumsinsi wokuzimilela kuleli.
Kubalulekile ukukhumbula ukuthi kunoma yisiphi isizwe, ulimi luyinqolobane yamasiko, okungaba wubuciko nobugagu bokulusebenzisa noma amagama alezo zinto ezisetshenziswayo kumbe ezazisetshenziswa empilweni yemihla ngemihla ( material culture).
Ukuthinta lesi sihloko kakusho khona ukuthi leli phephandaba limsulwa kulokho okubonakala kuwukubulawa kolimi ngabanikazi balo nsuku zaphuma.
Empeleni nalo kalimsulwa kule nkinga.
Ukuyiqonda kalula inkinga yokubulawa kolimi eshiwo lapha, kungcono ukusebenzisa izibonelo esesivamise ukuzizwa uma kukhulunywa ngendlela ebhimbayo.
Umfundi angadideki, lapha kakumelwene nokukhula kolimi ngenxa yokuba umphakathi uhlangabezana nezimo ezihambisana nezinguquko ezithile kodwa okushiwoyo lapha wukuthi makungaphoqwa amagama abhimbayo uma kutolikwa awezinye izilimi ikakhulukazi uma evele ekhona amagama aqonde lokho okukhulunywa ngakho.
Lona wumzamo ocishe ufane nalokho okwakwenziwa wuhlelo olwabe luzwakala esiteshini somsakazo solimi lwesingisi, ISA FM, olwalusihloko sithi, “Strictly speaking” ngalo okwabe kuxhozwa lapha nalaphaya lokho okwakulimaza indlela eqondile yokukhuluma isingisi.
Ukuthemeleza singakunqamula khona lapha bese sihlala phezu kwayo indaba ngokunika izibonelo zokulinyazwa kolimi lwesizulu ngabanikazi balo:
* ameva aphuma nobovu, hhayi nobomvu;
* izinkomo zokulobola noma ngabe zingaki kazibizwa ngamalobolo ngoba nakhu ziziningi, kodwa kuthiwa yilobolo. Nxa ufuna ukusebenzisa igama elisebuningini kuthiwa amabheka;
* umuntu ogula kakhulu kakushiwo ukuthi ulwela impilo yakhe.
Lokho yisingisi ngesizulu. Kuthiwa ubangwa nezibi, noma kwembulwa kwembeswa, kumbe sekubonwa ngokusa;
* Ozibiza ngenyanga kodwa enukeka ezenzweni zokubulawa kwabantu kucwiywe izitho zabo, empeleni akasiyo inyanga kodwa owenzenjalo kuthiwa umthakathi;
* Obhozomela intombazane ahambe nayo ngenkani, athi uyayithwala qede ayidlwengule ethi uyayiganisa - empeleni lokho wukuthumba, nokusho ukuthi kumele aboshwe.
(Ozizwa edideka ngalolu daba I-SA FM ike yayilwa eyokuqondisa isingisi angabuza nakwabekhomishini yezamasiko, ezenkolo nezilimi abe nesiqiniseko);
* udaba noma indaba okuxoxwa kakhulu ngayo akushiwo ngesizulu ukuthi undabamlonyeni, kungenzeka mhlawumbe olimini lwesixhosa.
Ngesizulu kuthiwa ngundabizekwayo noma kuthiwe indaba esematheni;
* Ozimbandakanya nenhlangano ethile kuthiwa uyilungu layo kanti ilunga lichaza inkomo enemibala omhlophe nomnyama;
* akushiwo ukuthi ligotshwa lisemanzi kodwa kuthiwa ugotshwa usemanzi, njengoba siye sibone nxa kugotshwa izintungo kwakhiwa indlu yesizulu iqhugwane;
* ukudlala iqhaza akukho olimini lwesizulu kodwa iqhaza liyabanjwa;
* Indima nayo ayidlalwa; * Umhlangano awubanjwa kodwa umema abantu ukuba bahlangane bese lokho kuba wumhlangano;
* Uma uphaphathekile kakushiwo ukuthi uphashile.
Leli yigama lesingisi elithi ‘ parched’ elisho ukoma kakhulu;
Lapha besikha nje phezulu kulokho okubulala ulimi lwesizulu ngabanikazi balo nsuku zonke. Lapha siyakuvuma ukuthi ukufika kwezinye izizwe nezilimi zazo kanjalo nokudla ngalukhezo lunye esikubona kuqala ukwenzeka kuleli, nakanjani kuzoba nawo umthelela olimini.
Kepha lokhu sikholwa wukuthi kuhamba ibanga nxa kuza enqolobaneni yamagama athuthukisa ulimi kodwa lokho kube kungaluguqulile uhlaka lolimi ngendlela olusebenza ngayo.
Yingakho sikuncoma ukuvela kwamagama amasha alukhulisayo ulimi njengalawo aqhamuke nezifundiswa zakithi kubalwa usolwazi Otty Nxumalo.
Phela nguyena ovele nelithi ulibofuzo nxa kushiwo IDNA ( dioxyrebose nucleic acid). Kukhona nezinye izindlela zokubeka inkulumo ezachunyiswa ngamagagu afana nomnu Thokozani Nene ongasekho.
Isibonelo, uma echaza izingozi zomgwaqo njengaleyo eyaziwa ngesingisi ngokuthi head-on collision, umnu Nene wakubiza lokho ngokuthi zitholene mahlanze, kuthi lokho amangisi akubiza nge- ambush noma ‘ to waylay’, athi ukulalela unyendle - kube mnandi kuthi cosololo.
Umsakazi noma umbhali wephepha akabe esabanankinga nxa esehlangana nalesi simo sekumele enze umbiko. Kanti-ke ezinye izindlela zokukhula kolimi kazidingi osolwazi namaciko ngoba umphakathi uvele uziqambele wona.
Njengokuthi ababolekisa imali kwabanye bese befuna inzalo emba eqolo, lokho ngesingisi okuthiwa ngama- loan sharks, umphakathi wavele wabetha ngelithi omashonisa.
Lesi yisihloko esibanzi nokho, lokhu okuncane okubalulwe lapha kwethenjwa ukuthi kuzosiza ukucacisa ukuthi yimuphi umonakalo okukhalwa ngawo kanjalo nokuthi ukuthuthuka kolimi kuyenzeka ngaphandle kokubhidliza izisekelo ebezikhona izizukulwane ngezizukulwane.