NGAPHANDLE KWENKUNDLA

AKAHLUKANI nebhayibheli ugladwin Shitolo (29) ongumdlali wechippa United egijima kwiAbsa Premiership.

Ushitolo uzalelwe egiyani, elimpopo. Uzalwe mhla ka-10 kuncwaba (August) ngo-1989.

Ufunde amabanga aphansi endzalama Primary School, ngaphambi kokudlulela egiyani High School. Kuthe esefunda ugrade 10 kwaphoqeleka ukuba alibangise egauteng kwinkulisa yejomo Cosmos ukuyozama amadlelo aluhlaza. Ube eseqhuba imfundo yakhe e-altmont High School egoli, okuyilapho ephothule khona umatikuletsheni.

Lo mdlali uthi ekukhuleni kwakhe ayikho into akade eyicabanga ngaphandle kokudlala ibhola. Uqale ukulidlala kwigiyani All Stars Academy ngaphambi kokuba adlulele esikhungweni sejomo Cosmos.

Lo mdlali ugijime ezigabeni ezincane zecosmos kwaze kwaba unyuselwa esikimini esikhulu.

Ukudlala kahle kwicosmos kuholele ekutheni asayiniswe yiOrlando Pirates embolekise kwichippa United.

Ushitolo akasilo ivukane ebholeni lakuleli njengoba esegijime emaqenjini amaningi okungabalwa kuwona iplatinum Stars, ilamontville Golden Arrows, icosmos kanye nepirates.

Udlalile nasemaqenjini amancane esizwe akuleli njengoba egijime imidlalo engu-15 ku-under 23 nengu-10 ku-u/20.

Unxusa intsha ukuba ingaguquki emaphusheni ayo uma izimisele ngokuphumelela.

Ube esecela ukuba abashayeli baziphathe kahle kulamaholidi ephasika ukugwema izingozi zomgwaqo.

Ingxoxo kashitolo NELANGA

Langasonto ( I/ L) ngempilo yakhe ya-ngaphandle kwenkundla ihambe kanje:

I/ L: Ukhule ungumuntu onjani?

Shitolo: Ngikhule ngingumuntu onamaphupho amaningi ngempilo yami ngenhlanhla iphupho lami lokudlala ibhola esigabeni esiphakeme lifezekile.

I/ L: Ngabe ukhulele ekhaya elinjani?

Shitolo: Ngikhulele emndenini okholwayo umama ubeqinisekisa ukuthi njalo ngamasonto sonke siya enkonzweni. Kuze kube yimanje nami ngiqhuba yona imiyalelo yabazali bami. Bekuthi uma umuntu engayanga esontweni ajeziswe kanzima.

I/ L: Ngabe abazali bakho basaphila bobabili?

Shitolo: Yebo basaphila ubaba ngunathaniel umama ngunancy.

I/ L: Nibangaki kwenu?

Shitolo: Sibathathu, kuqala mina kulandele umfowethu utrevor bese kugcina udadewethu unyiko.

I/ L: Ngabe uyakwazi ukupheka?

Shitolo: Ngeke ngisho ukuthi ngiyakwazi kodwa ngiyazama ngoba ngiyakwazi ukupheka izinto ezilula ezifana nerice nepapa.

I/ L: Hlobo luni lokudla olukhonzile ?

Shitolo: Ngikhonze ispaghetti nemince ngijabula kakhulu mangidle khona.

I/ L: Hlobo luni lomculo olukhonzile ?

Shitolo: Ngithanda kakhulu umculo wokholo kwazise ngikhule ngidlala wona.

I/ L: Ngabe utshabaza ngamotoni ?

Shitolo: Okwamanje angikabi nayo imoto.

I/ L: Uphatha hlobo luni lukamakhalekhukhwini?

Shitolo: Ngiphatha i-iphone SRC.

I/ L: Iliphi iqembu okhule ulithanda kuleli naphesheya kwezilwandle?

Shitolo: Kuleli ngikhule ngiwumlandeli wemamelodi Sundowns kanti phesheya kwezilwandle ngikhule ngilandela ibarcelona ngichazwa kakhulu indlela abaphaselana ngayo kamnandi.

I/ L: Ngabe ikhona incwadi oyifundayo noma uhlelo lukamabonakude olukhonzile?

Shitolo: Zikhona izincwadi engizifundayo ezikhuluma ngocwaningo lwamabhizinisi kwazise sengiqalile ngilungiselela impilo uma sengiyeke ibhola. Kumabonakude ngizifela nge-the Queen.

I/ L: Hlobo luni lwesiqholo osisebenzisayo?

Shitolo: Ngisebenzisa i-azarro.

I/ L: Yimuphi umkhuba oke wawugila usakhula ongasoze wawukhohlwa?

Shitolo: Ngikhumbula ngelinye ilanga abazali bami beye emngcwabeni basishiya sodwa nomfowethu. Umama uvuke wapheka kamnandi inyama. Sithe masivuka nomfowethu savuka sasidla sonke isishebo silokhu sisidla siphindelela. Kube wukubuya emngcwabeni wasithela uswazi.

I/ L: Yini oyifisayo nekilabhu yakho?

Shitolo: Ngifisa ukuba sisuke kule ndawo esikuyo njengoba sibalwa namakilabhu avika izembe.

I/ L: Yini oqala ngokuyenza uma uvuka ekuseni?

Shitolo: Ngivuka ngithandaze ngibonge ukuphila ngaphambi kokulungiselela ukuyojima.

I/ L: Usichitha kanjani isikhathi sakho mawungekho matasa?

Shitolo: Ngiyaye ngiziphumulele noma ngivakashele abangani bami.

I/ L: Yimalini osuke wayibhubhudla nabangani bakho ngobusuku obubodwa?

Shitolo: Siyaye sihlanganise ngokulinganayo ukuze kungeke kulimale muntu ekugcineni.

I/ L: Yisiphi isipho osuke wasipha abazali bakho?

Shitolo: Ziningi kakhulu izinto esengizenzele umndeni wami kwazise yiwona ongeseka kakhulu empilweni yami.

I/ L: Ufisa ukwenzani uma usuyeka ukuba wumdlali webhola?

Shitolo: Ngifisa ukuziqhubekela namabhizinisi kumanje ngiyaqala ngibheka izinto ezingangisiza ngiqale ibhizinisi ukuze ngingeke ngibe nenkinga mangingasadlali.

I/ L: Yiliphi izwe ofisa ukulivakashela phesheya kwezilwandle?

Shitolo: Ngithanda kakhulu espain, kunezinto eziningi ezingichazayo khona.

I/ L: Ngabe ukhona osondelene nenhliziyo yakho?

Shitolo: Ngizocela ukungaphawuli lutho okwamanje ngalokho. I/ L: Abantwana bona unabo?

Shitolo: Cha anginaye umntwana.

I/ L: Ungabaluleka uthini abantu abafisa ukuhamba ezinyathelweni zakho?

Shitolo: Umuntu akazethembe aphinde azimisele kwakwenzayo, angavumeli ukudikibala kalula ngoba wonke umuntu unesabelo sakhe emhlabeni.

KUSUKA kwesokudla ugladwin Shitolo, umama wakhe unancy, ngumfowabo utrevor nodadewabo unyiko.

UMAMA kagladwin, unancy.

UDADEWABO kagladwin unyiko.