AKAYIPHUPHI EYOKUYEKA IBHOLA OWODUMO KWI-PIRATEAS
AKAYIPHUPHI ngisho elele eyokuyeka ibhola umdlali ozakhele udumo egijima kwi-orlando Pirates oskuphele isizini engenakilabhu.
U-ayanda “Malume” Gcaba (33) ( osesithombeni) ozakhele udumo kwipirates okumanje akanakilabhu, uthi ngeke aliyeke ibhola futhi unethemba lokuthi ikhona ikilabhu esazomunika ithuba adlale esigabeni esikhokhelayo.
Ugcaba ugcine ukubonakala ebholeni ngesizini eyedlule egijima kwiplatinum Stars egcine igengcwe yizembe.
Ubekade ebolekiswe kuyona yipirates.
Kuthe kungaphela isizini ipirates yangabe isayelula inkontileka yakhe yamdedela.
Selokhu ededelwe yibucs, udonsa kanzima ukuthola ikilabhu.
Uke wazama inhlanhla kwihighlands Park nakwiblack Leopards kodwa abangavumelanga ngemali wahamba.
Uke wajima nereal Kings kodwa wagcina engasayinanga nayo.
Engxoxweni ugcaba abe nayo naleli phephandaba ulitshele ukuthi angeke nangengozi aliyeke ibhola ngoba ukholwa wukuthi kuningi asangakwenza kulona.
“Umzimba wami usavuma, ngiyazizwa ukuthi ngisangawadlala amasizini amathathu nangaphezulu kwalokho.
"Inkinga yalapha eningizimu Afrika wukuthi umdlali uma eke waba neminyaka yobudala engu-30 ubizwa ngekhehla kanti isipiliyoni asithengwa ndawo.
"Kodwa-ke ngeke ngiphele umoya, nginethemba lokuthi ngesizini ezayo ngizobuyela ebholeni.
"Akumnandi ukuhlala, angifuni ukuqamba amanga kodwa ayikho into engingayenza uma kungaqhamuki lutho ngizolinda nje isizini ezayo,” kusho ugcaba.
Limbuza leli phephandaba ukuthi umatasa ngani njengoba engadlali uthe: “Okwamanje ngizijimela ngedwa iyona ndlela engizikhuthaza ngayo leyo.
"Ngingapha Kwazulu-natal ngoba isifiso sami wukuthi ngizodlala ngasekhaya.
"Angeke ngikhethe kilabhu nakwinfd ngingadlala anginankinga ngoba ibhola iyona into engiyazi kangcono,” kusho ugcaba.