ESKHALENI:
KUMQOKA ukuthi iziphathimandla zomkhandlu wetheku zikhuthazwe ukuqhubeka nokubhidela ukuthi leli dolobha lisingathe imicimbi emikhulu ngoba ibamba iqhaza elikhulu ekufukuleni umnotho wedolobha.
Itheku kusanda kumenyezelwa ukuthi lizosingatha umdlalo wamanqamu wenedbank Cup nomcimbi wokukhishwa kwemiklomelo yepremier Soccer League (PSL).
Kamuva nje, leli dolobha seligixabezwe ngegunya lokusingatha imidlalo yecosafa Cup nonyaka.
Abantu abaningi bahlale bethi akukho mqoka ukuthi leli dolobha lisingathe imicimbi emikhulu ngoba akukho mehluko owenzeka ezimpilweni zabo, okufakazelwa
yimibhikisho yemihla ngemihla.
Isimo somnotho wezwe lethu sibi kakhulu, ngakho-ke ukusingatha kwetheku imicimbi emikhulu kuyasiza kakhulu njengoba kungenisa imali eningi.
Amahhotela nje, ngabe asedilize inqwaba yezisebenzi ukube imicimbi kayizi ethekwini.
Ezokuthutha ngabe zithwele kanzima ukuba imicimbi kayizi kuleli dolobha. Kunenqwaba yosomabhizinisi abahlomulayo ngokulethwa kwemicimbi ethekwini, kanti nabo badala amathuba emisebenzi njengoba beyaye baqashe abantu.
Kunabantu abaziphilisa ngokudayisa izinto ezahlukene nxa itheku lisingethe imicimbi emikhulu, okubamba iqhaza emnothweni wedolobha. Sikhuluma nje, itheku livivela ukusingatha i-africa’s Travel Indaba ezoqala mhla ka-2 isongwe mhla ka-4 kunhlaba (May).
Sikuqonda kahle ukuthi amanye amadolobha anomona ngokuthi i-travel Indaba isingathwe yitheku. Kumanje kunomsindo ngokuthi kungani umdlalo wamanqamu wenedbank ulethwe emoses Mabhida ungayiswanga enkundleni yasefree State.
Abanye baze baphumele obala bagxeke umato Madlala ( osesithombeni) oyisikhulu esiphezulu esibambile kwipsl ngokuthi unokulenzela umusa itheku.
Kakade vele ingane enhle isebenzela ekhaya. Umato usekomitini lo Mkhandlu wetheku elisebenza ukuheha abatshali zimali ukuze kusimame umnotho wedolobha.
Kungumsebenzi wakhe-ke ukuqinisekisa ukuthi leli dolobha lisingatha imicimbi ezoshiya umnotho wetheku usimeme.
Abantu akumele bakhohlwe wukuthi itheku yilona lodwa eliyimetro Kwazulu-natal, kanti ezinye izifundazwe zinamadolobha amaningi angamametro, okwenza akwazi ukuhlela imicimbi emikhulu ezindaweni ezahlukene.
Ukube ikwazulu-natal inelinye idolobha eliyimetro, ngabe nalo liyakwazi ukusingatha imicimbi emikhulu, ngakho-ke akungabukeki sengathi itheku lenzelwa umusa ngokunikwa ithuba lokusingatha imicimbi.
Miningi kabi imisebenzi evelayo nxa itheku lisingethe imicimbi, okuchaza ukuthi abantu bayakwazi ukuxosha ikati eziko. Itheku aliqhubeke nokukhuthalela ukusingatha imicimbi ukuze kuvele amathuba emisebenzi kubantu bakithi.