Umfundisi ubhoboka ngemizuzu yobumnyama
Amakholwa atatululwe kwaze kwasa kufa awu-13
UBHOBOKA ngemizuzu enzima yokufelwa ngamalungu awu-13, kwalimala kabi awu-11, embozwa wudonga lwehholo lebandla umfu Phiwayinkosi Sibiya, ongumkhulumeli wepentecostal Holiness Church, eheatonville, empangeni.
Le nhlekelele yenzeke emuva kokuvalwa kwenkonzo yangoLwesine eqedwe ngo-9 ebusuku, kwabe sekulungiselelwa ukuyolala, naye wahamba ephikelele eshowe. Nokho uthi uhambo lwakhe lunqandwe yimvula ebina ngamandla, wabuya wayopaka eceleni kwalo ihholo.
“Ngithe ngisapakile liyithela, kumnyama, kwafika kimina umfana ezongibikela ukuthi abantu sebembozwe wudonga. Ngaleso sikhathi bekumnyama bhuqe, sikhanyisa ngamaselula.
“Sizamile ukushayela amaphoyisa, kwacaca ukuthi kawadonsi amaselula ethu. Savele saya khona. Afike abiza ama-ambulense nabezimo eziphuthumayo, kwaqalwa kwatatululwa kwaze kwaba sekuseni,” kusho umfu Sibiya.
Uveze ukuthi imvula ibilokhu iyishayile, yaze yaqala ukudamba sekufike abezimo eziphuthumayo namaphoyisa.
Nokho kushiye imibuzo ukudilika kodonga oluyingxenye yehholo laleli bandla kwazise lubukeke lungenazo izinsika ezesekela ubude balo.
Ungqongqoshe womnyango wezisebenzi kuleli, unkk Mildred Oliphant, unxuse bonke abazoduduza kuleli bandla nabezindaba ukuba bangaphangi ukuhlonza izizathu ezidale le ngozi kuze kube uphenyo luyaphothulwa okuyilapho kuzovela khona izimpendulo.
Ukhalele imindeni yabashonelwe nabalimele, waduduza nebandla ngokulehlele. Uveze ukuthi uyilungu laleli bandla. Uthe kwenzeke lesi sigameko ngolwesine ebusuku nje, ubezoba yingxenye yenkonzo yangoLwesihlanu.
ILANGA Langesonto libe ngelokuqala kwabezindaba ukufika kule ndawo engaba ngamakhilomitha awu-10 ukusuka edolobheni empangeni, ngomgwaqo oya enkwalini.
Lifike abazalwane beme amaqoqwana, bedangele, kanti khona lapho ubuzwa ngesililo esinomunyu siqhuma phezulu uma sekufika izihlobo zabathile abangasekho. Bekungelula ukuthola amagama abantu abebekhona kwenzeka le nhlekelele, kwazise bebeyaliwe ngabaholi bebandla nabomthetho ukuba bangathi vu.
Umfu Sibiya uvumile ukuthi ngabesifazane bodwa abebelele ehholo, nomfanyana oshone elele nonina. Uthe kwabashonile bawu6 abasolundi, bane abasesikhawini, nabathathu bakwamaqhwakazi eshowe. Ngolwesibili izihlobo zilindeleke ukuba ziyohlonza izidumbu ngokusemthethweni
emakhazeni kahulumeni empangeni.
Umholi webandla kuzwelonke, umbhishobhi Moses Sibiya, ubengekho kwenzeka le nhlekelele, ubesenkonzweni egauteng. Empangeni bekukhona iphini lakhe, umbhishobhikazi Thandi Ngema.
Oyiphini lemeya eking Cetshwayo District, unkk Alice Mthembu, nemeya yasezululand umnu Thulasizwe Buthelezi, bebekhona.
Ungqongqoshe wezindaba zabomdabu nokubuswa ngokuBambisana kuzwelonke, udokotela Zweli Mkhize ufike kamuva, wayobona abalimele esibhedlela, kanti uzakwabo wesifundazwe, unkk Nomusa Dube-ncube, ufike ezintatha.
Nakhu okubonwe YILANGA Langesonto kule ndawo yesigameko:
Bekunezingubo zokulala ezigqitshwe yizitini ezibomvu.
Bekukhona imoto ebipake ngaphandle kwehholo okuthiwa ngeyentokazi ebivela olundi, eshone yashiya ingane esindile khona lapho.
Abanye bafike bekhala ngomakoti oshone nengane.
Bekujabhe ngisho abebeqashelwe ukwenza imisebenzi eyahlukene, kubalwa ukufaka amatende, ukuhlobisa nokupheka, konke lokho bese kubuyiselwa emuva ngolwesihlanu.
Bekunenguzanguza yetende namanye amabili.
Bekukhona injini enkulu yokukhanyisa.
Abanye abebekhona bathe kube nokushintsha kwesimo sezulu, kwaba nesichotho emuva kwalokho kwaba mnyama kwabe sekudweba umbani bezwa ukuqhuma kwadilika udonga.
knowledge.simelane@ilanganews.co.za