Izigi zedowns sezikhala eduze kwi-orlando Pirates
I-arrows ikhishwe yits Galaxy kowenedbank Cup
ILUNGISE iphutha imamelodi Sundowns inciphisa igebe lamaphuzu esicongweni se-absa Premiership ihlula ibaroka ngo-2-1 izolo ngomgqibelo ntambama e-old Peter Mokaba Stadium, epolokwane.
Idowns izenzele phansi ihlulwa yisupersport United ngo-2-1 ngolwesithathu. Idowns izama ukuvala igebe eselivulwe yi-orlando Pirates ezihola phambili ngamaphuzu angu-50 emidlalweni engu-27.
Amagoli okunqobe ngawo idowns avalelwe nguricardo Nascimento ngomzuzu ka-38 nothemba Zwane ngoka-57, kanti elebaroka lishaywe ngu-onkabetse Makgantai ngoka-52.
Idowns isinamaphuzu angu-47 emidlalweni engu-26. Idowns izobhekana nechippa United ngolwesibili eloftus Versfeld ngo-15h00. Ukunqoba lo mdlalo kuzokwenza ibe namaphuzu angu-50, bese ibambana ne-bucs okuzokuthi ngolwesithathu ngo-19h30 idudulane nemaritzburg United koweligi eharry Gwala Stadium, emgu-ngundlovu.
Ngemuva kwalokhu, idowns izobhekana newydad Casablanca yasemorocco emlenzeni wokuqala we- semi final yecaf Champions League mhla ka-26 kwephezulu, kanti umlenze wesibili uzokuba mhla ka-4 kunhlaba (May).
Ngaphambi komdlalo womlenze wesibili, idowns izobhekana neblack Leopards ngolwesithathu mhla ka-1 kunhlaba. Emdlalweni olandelayo, izokwamukela ilamontville Golden Arrows ngoLwesibili lomhla ka-7 enyangeni efanayo bese isonga isizini ngokuvakashela ifree State Stars mhla ka-11 kuyena futhi unhlaba.
Kungena ele-arrows nje, ingene ehlazweni inenebulwa yits Galaxy ngo-3-1 kwi- semi final yenedbank Cup izolo esugar Ray Xulu Stadium, eclermont.
I-arrows yiyona ebone imbobo yepali kuqala uknox Mutizwa eshaya iphenathi ecishwe yigoli legalaxy elivalelwe nguSandile Zuke okube wumkhonto ogwaza ekhaya.
Amanye amagoli egalaxy avalelwe nguzakhele Lepasa ngesiwombe sesibili esikhathini esengeziwe.
Izitobha ze-arrows bese zihuqa ubuthongo sekuzophela lo mdlalo, okwenze igalaxy yazicanasela.
Bekulindeleke ukuthi i-arrows iwunqobe lo mdlalo kwazise owamanqamu uzokuba mhla ka-18 kunhlaba emoses Mabhida Stadium, ethekwini.
Igalaxy idlala kwinational First Division, kanti i-arrows igijima kwi-premiership. Ukuphuma kwe-arrows kusho ukuqhubeka kweshobolo lezindebe kusteve Komphela oyicijayo.