Abaculi nencwadi yezikhalo kuramaphosa
USUDALE uqhekeko phakathi kwabaculi nabalingisi umthethosivivinywa obizwa ngecopyright Amendment neperformers Protection Amendment Bill osekubambe ukuba usayinwe ngumengameli wezwe umnu Cyril Ramaphosa ukuwuphasisa ukuba wumthetho.
Lo mthethosivivinywa uvuna abalingisi, kawubalweli abaculi osekudale ukuthi (abaculi) babhalele umengameli incwadi ephuthumayo, bemnxusa ukuba angaqale awusayine lo mthethosivivinywa.
Bathi uvikela abalingisi kuphela.
Phakathi kwabakhala ngakho laba baculi, bathi le mithetho izobacindezela emisebenzini yabo njengoba ingasho lutho ngokuhlomula kwabo emculweni wabo uma udlalwa phesheya noma emafilimini.
Ngakolunye uhlangothi, abalingisi bathi sesiside isikhathi lo mthetho-sivivinywa waphasiswa ephalamende nakwinational Council of Provinces, bona banxusa ukuba umengameli awusayine.
Phakathi kwabaculi ababhalele umengameli le ncwadi kubalwa uzwai Bala, uyamikani Janet Banda (Lady Zamar), uclaire Johnston (Mango Groove), utheo Kgosinkwe nonhlanhla Nciza (Mafikizolo) ( abasesithombeni), unkosinathi Maphumulo (Black Coffee), urefiloe Phoolo (Cassper Nyovest), uthemba Sekowe (DJ Maphorisa), untokozo Mdluli (KO) nomdu Masilela.
Umnu Phatud Mphahlele, wenhlangano yabaculi nabashicileli, imposa, utshele leli phephandaba ukuthi kabanankinga nomthetho-sivivinywa weperformers Protection Amendment ngoba ucacile kodwa banenkinga nowecopyright Amendment.
“Lo mthetho-sivivinywa kawucacisi kahle ngokuvikeleka kwabashicileli bomculo kanti uvulelekile yingakho sinxusa umengameli ukuba awubuyisele emuva bawubuyekeze ukuze sonke sivikeleke,” kusho umnu Mphahlele.
Umnu Mabutho Kid Sithole, ongumengameli wenyunyana yabaculi, icreative Workers Union, uthe usezwile ngokukhala kwabaculi kanti ngolwesithathu bazoba nomhlangano mayelana nalezi zikhalo zabo.
“Sizobheka izikhalo zabo bese sithatha isinqumo ngoba kumele umthetho ophasiswayo uvikele wonke umuntu, ungakhethi iphela emasini. Njengenyunyana emele wonke amaciko, kuwumgomo wethu ukuqinisekisa ukuthi akekho ozuza ngokucindezela omunye,” kusho umnu Sithole.
Okhulumela ihhovisi likamengameli, unkk Khusela Diko, uthe ubengakezwa ngale ncwadi, ngakho ngeke akwazi ukuphawula ngayo ngoba akanaso isiqiniseko sokuthi isifinyelele yini ehhovisi likamengameli.
Ngakolunye uhlangothi, umarang Setshwaelo wenkampani idream Catcher, esabalalise le ncwadi kwabezindaba, ukuqinisekisile ukuthi le ncwadi bayithumele ehhovisi likamengameli.