USEZOBONAKALA EMDLALWENI ISIBAYA UMARTIN ZIQUBU
USEKHONJWA kwisibaya kumzansi Magic ( channel 161)
umartin Ziqubu ( osesithombeni),
ogqame ngokulingisa emidlalweni yomoya emsakazweni ukhozi FM, nogqame muva nje engubab’ udetective Nkomo emdlalweni ihostela kuwona umzansi Magic.
Umthombo osondelene nezenzeka kwisibaya, uthe uziqubu ozobizwa ngojamludi kulo mdlalo uqale ukuqopha ngolwesihlanu.
Uzolingisa indawo yokuba ngumeluleki omdala wasemabomvini kadabula Ngubane (Chris Qwabe), oyinkosi ethothoza etilongweni njengamanje ngokomdlalo. Nokho ILANGA Langesonto
alikwazanga ukuthola ukuthi uzoqala nini ukubonakala emdlalweni ujamludi.
Kwihostela okuyilapho egqame khona, ubeyingwevu yephoyisa. Uke wathi xhinti nakwimbewu:
The Seed engumnikazi wendawo yenjabulo Emsamo.
Ekhuluma NELANGA Langesonto, uzwakale ewajabulela amathuba awatholayo okuvela emidlalweni kamabonakude muva nje.
“Khona bekuvele kuyisifiso sami ukulingisa kwitv kodwa bengibanjwe wumsebenzi ebengiwenza wobuthisha ngoba kudingeka isikhathi uma uqophela ITV. Manje-ke thina sikhule siyihlonipha imisebenzi, bengingeke ngikwazi ukuyoqopha izinto zetv ngimise umsebenzi wokufundisa.
"Ukulingisa emsakazweni bekuvala leso sikhala. Kuthe uma ngithatha umhlalaphansi ngofebruary wonyaka odlule, yaqala yavuleka iminyango kwitv,” kusho yena evuma nokuthi usephakathi kwisibaya.
Ubefundisa esondelani Combined School, entuzuma E ethekwini. Kuyimanje ulingisa emdlalweni womsakazo othi “Buchitheka Bugayiwe” odlala nsuku zonke ntambama lapho enguthemba. Emdlalweni othi “Kusa Kusa” ubengungqongqo edume kakhulu kuwona. Miningi neminye abelingisa kuyona. U-emmah Ngomane, obambile ukukhulumela lo mdlalo ongaphansi kwem-net, ukuqinisekisile ukuthi uziqubu uzobonakala engomunye wabadala bomndeni wakwangubane. Uphinde waveza nokuthi omunye owaziwayo ozobonakala kuwona maduze, nguAubrey Poo, ozoba ngummeli ozoqala ukubonakala ngomay. zowakha@ ilanganews. co.za