AKAZIBONI EBUYELA ESTUDIYO OQOKWE KABILI KUMA-SAMA
ASIZIBONI siphinde sibuyela e- studio isilomo esingumculi we- gospel esiqokwe eminxeni emibili kumasouth African Music Awards (Sama). Ukholeka oqokwe kowebest Traditional Faith Music Album nowebest Produced Album, uthi ujabule ngokweqile ethola izindaba zokuqokwa kwakhe kula ma- award okuklomelisa abaculi, emcimbini obuse-alberton Civic Theatre egoli ngolwesine.
Kulo mcimbi kumenyezelwe abaqokiwe kanti UDJ Black Coffee nguyena ohambe phambili ngokuqokwa kaningi eminxeni emihlanu.
Ukholeka uthi ngesikhathi kumenyezelwa igama lakhe uhluleke nawukuzibamba, wenza umdanso adume ngawo.
“Nakuba bengingalindele ukuqokwa kodwa kungijabulisile ukuzwa igama lami limenyezelwa, ikakhulukazi selimenyezelwa kowebest Produced Album,” kusho lo mculi uthi eyebest Produced Album imjabulisa kakhulu, kwazise nguyena oziphrojuselile le albhamu eqoshwe bukhoma esihloko sithi “Alibuyi Lilambatha”.
Uthi eminyakeni engu-25 esemculweni ubeqala ukuqopha bukhoma.
“Kusukela manje ngeke ngiphinde ngingene e- studio, wonke umculo wami sengizowuqopha bukhoma,” kusho ukholeka.
Okunye athi kumenza ajabule ngokweqile ngale albhamu yakhe wukuthi kumthathe cishe iminyaka engu-8 ngaphambi kokuba ayikhiphe njengoba ebesaqongelela imali yokuqopha bukhoma.
“Ayikho inkampani enkulu engisebenze nayo noma usomabhizinisi ongixhasile ngesikhathi ngiyenza, konke ngikuqongelele mina kwaze kwaba kuyalunga,” kusho lo mculi eveza nokuthi usezinhlelweni zokwenza umzungezo wemicimbi yakhe lapho ezobe ecula bukhoma njengoba eqalile ngempelasonto yephasika e-east London.
Ukholeka uqokwe NO-AKA, Zonke, Nasty C nomlindo The Vocalis kowebest Produced Album kanti kowebest Traditional Faith Music uqokwe nolebo Sekgobela, Paul K, Sipho Ngwenya nespirit of Praise 7.
Khona manjalo lugcine lungamenyezelwanga uhlu lwabaculi nezingoma eziqokwe emunxeni werecord of the Year njengoba ILANGA Langesonto libikile ngeledlule ngokungabibikho kwalolu hlelo olukhonjiswa KWISABC 1. Akucaci ukuthi luzomenyezelwa nini kanti abanye babaculi abangaveli kwabaqokiwe sebethembe lo munxa werecord of the Year.