Siza ethekwini iskwatta Kamp
UTHI akakujahile ukuqopha IDVD bukhoma umzwilili osezakhele igama emculweni ubrenda Mtambo.
Lo mzwilili, ozakhele udumo ngezingoma zakhe ezihlabahlosile, uthi nakuba isikhona ingcindezi yokuthi kumele aqophe bukhoma kodwa akakujahile lokho, kwazise usazimisele ukukhipha inqwaba yezingoma ngaphambi kokuba athathe lelo gxathu.
Ubrenda usematheni ngenoni asanda kulikhipha elisihloko sithi, “Ungowam’ Forever” elidlalwa kakhulu emsakazweni kulezi zinsuku.
Uthi isikhathi sokuqopha bukhoma sizofika, usafuna ukwandisa emgodleni wakhe.
“Uma senginezingoma engicabanga ukuthi zanele ukungena kwidvd yami bukhoma ngizoqopha, okwamanje ngizolokhu ngidedela amanoni ngalinye,” kusho yena.
Uthi okwamanje agxile kukhona wukuqinisekisa ukuthi inkampani yakhe, ibusa Music, iyakhula njengoba nale ngoma ezenzele yona ngokwakhe.
“Njengoba sengizimele yilapho ngizokwenza izinto ngendlela yami ngaphandle kokulandela imiyalelo yomunye umuntu. Nezingoma engizozenza zizobe zihambisana nami futhi kunabantu enginesifiso sokusebenza nabo ezingomeni zami,” kusho ubrenda.
Nakuba engabagagulanga abaculi anesifiso sokusebenza nabo kodwa akakufihlanga ukuthi uyazifela ngomsebenzi kasjava.
“Ungomunye wabaculi abanekhono kanti kungaba yintokozo ukusebenza naye (usjava),” esho.
Echaza ngale ngoma yakhe, uthi ikhuluma ngothando kanti inezinhlamvu zesizulu nezesiSwahili.
Uthi ufisa umculo wakhe usabalale e-afrika nakwamanye amazwe, yingakho efuna nokusebenza nabadidiyeli bomculo abaqhamuka ezindaweni ezahlukene.
Ubrenda uzakhele udumo esebenza nejoyous Celebration. Nakuba engene nge- gospel emculweni kodwa isifiso sakhe bekuwukucula umculo we- afro soul.
“Nangesikhathi ngingena kwiJoyous ebengisebenza nabo bebazi ukuthi mina ngingumuntu we- afro soul, yingakho ngesikhathi ngikhetha ukuzimela ngingene kuyo,” kusho ubrenda.
LIZOVUMBUKA ethekwini iqembu lomculo we- hip hop osekuneminyaka lingabonwa nangalukhalo emculweni.
Iskwatta Kamp, okuyiqembu ebelingaconsi phansi ngeminyaka yama-2000, lizonandisa kuleli dolobha, okuyindlela elikhuza ngayo ibuya emculweni.
Ngokusho kukaslikour, oyilungu eliqavile kuleli qembu elinabayisithupha, kulo nyaka bazogxila ekuqinisekiseni ukuthi balibuyisa ngokugcwele iqembu.
“Bese kunesikhathi sikhuluma ngokubuya kodwa kungenzeki ngenxa yokuba matasa ngezinye izinto esizenzayo. Ngokomthetho besibeke unyaka owedlule kodwa kwangenzeka, yingakho kulo nyaka sibeke eceleni izinto zethu, sigxilisa imiqondo yethu kwiskwatta Kamp,” kusho uslikour engeza ngokuthi akukho abazokushintsha ngomculo abaziwa ngawo.
“Sizobuyisa isitayela sethu abantu abasazi ngaso. Okwehlukile wukuthi sizobe sikhuluma
ngezinto zamanje emculweni wethu,” kusho uslikour.
Leli qembu lizonandisa emcimbini obizwa nge-529 Social ozoba seviews At Twenty 5 ngomhla ka-3 kunhlaba (May) ohlelwa yikgolo Daguru Experience.
Uslikour unxusa abathandi bomculo we- hip hop ukuba baphume ngobuningi bazibonele ukubuya kwaleli qembu. Nomcimbi lona unesiqubulo esithi, Return Of The Throne - Skwatta Kamp.
Ngokusho kukaslikour, nakuba bekhona abaculi abasaqhubeka nokwenza kahle kulo mculo kodwa iskwatta Kamp sisahlukile kakhulu, kwazise akekho owenza into efana neyaso.
Amanye amalungu aleli qembu ngunish, Shugasmakx, Nemza, Bozza kanti uflabba akasekho emhlabeni, futhi u-infa akaselona ilungu laleli qembu.
Leli qembu lakhipha i-albhamu yalo yokuqala ngo-2002 kanti selike lahlabana ngenqwaba yezindondo okubalwa kuzo ezaMASAMA, nezechannel O.