Abefundisi bacela inhlalakahle emgungundlovu
ABAPHRISTI bebandla lamaroma akhatholika bebambisene nabaseSheshi edolobheni laseMgungundlovu bacela ukubambisana nomphakathi owakhele umasipala wasemsunduzi, emizameni yabo yokuletha inhlalakahle kuleli dolobha.
Bakhala ngokungahlanzeki kwalo nokugcwala kwamaphara abathi athwalise kanzima abazalwane bamabandla abawalusile.
Ngempelasonto edlule laba baphristi ngokubambisana nabazalwane bamabandla abawalusile batshathe isiphambano bahamba kweminye yemigwaqo yaleli dolobha besuka est Mary's Catholic Parish belibangase ekomkhulu lamasheshi icathedral of the Holy Nativity lapho lesi siphambano sifike sabekwa khona.
Lesi siphambano sibe sesinamekwa yintsha ngezingqwembe ebezibhalwe izinto ezikhathaza umphakathi wasemgungundlovu. Phakathi kwezinto ebezibhalwe kulezi zingqwembe ukungcola kwedolobha, ubugebengu obunhlobonhlobo, ukuntuleka kwamathuba omsebenzi nokunye.
Lolu dwendwe lwesiphambano belwethiwe ngesiqubulo esithi, “Babusisiwe abalamulayo ngoba bayakuthiwa ngabantwana bakankulunkulu”, esithathelwe evangelini elicashunwe encwadini kamathewu 7 verse 9.
Abaphristi abebesohlelweni ekuqhubeni lolu dwendwe ngabamakhatholika ufata Mhlanganisi Dlamini (OMI), ufata Ian Swart (OMI), nabasesheshi udean Ndabezinhle Sibisi, umfu Emilio Kasaba, umfu Mduduzi Ninela, umfu Thulani Zikhali nocanon Janet Trisk bese kuba ngumfu Peter Briggs we-united Church.
Ekhuluma naleli phephandaba udean Sibisi wasesheshi, uthe: “Siphila esikhathini esibuhlungu lapho abantu bengasakhululekile ikakhulukazi emadolobheni
ethu njengoba abanye befela khona.
“Kubuhlungu ukuzwa umzalwane ekhala kumphristi ngobuhlungu azwiswe bona kade eze edolobheni ezothengela umndeni wakhe. Idolobha lethu umgungundlovu linezinkinga eziningi kulezi nsuku ezidinga thina befundisi ukuba sikhulume nonkulunkulu ngazo, sicele ukuba asiphe amandla obuhlakani ukuziqeda.
“Izingane zethu zikhungethwe yizidakamizwa okuvelayo ukuthi izidleke zazo zikhona lapha ngaphakathi edolobheni lethu. Siyacela abazalwane ukuba babe nathi kule mpi esifuna ukuyinqoba.”
Ufata Dlamini wasest Mary’s Catholic Parish, obephambili ekuhlelweni kwalolu dwendwe, utshele abazalwane ukuthi izwe liyonakala uma abantu abangamakhristu bengakhulumi ngabakubonayo okungalungile.
“Sidinga amadolobha ahlanzekile futhi aphephile yikhona sizozigqaja kahle ngawo singabaseNingizimu Afrika uma sivakashele kwamanye amazwe.
Kumele sibe phambili kosombusazwe sibakhombise ukuthi kuhanjwa kanjani ngobungcwele,” ubeke kanje.