UKUBALULEKA KWEMFUNDO
UMHOLI weda KwazuluNatal uthi nakuba kusekuningi abantu abamnyama abasalele emuva kukho kwezentuthuko, kodwa uyakholelwa ekutheni intando yeningi kumele ilwele ukunikeza amathuba abantu bonke, ngaphandle kokubheka ibala.
Uthi kuyadabukisa nje ukuthi nakuba sekuhlangene iminyaka engu-25 leli zwe lathola inkululeko kodwa kusenabantu abaningi basemakhaya abayizwa ngendaba inkululeko.
Umnu Zwakele Maxwell Mncwango, ongowokuzalwa ehlalankosi, Kwanongoma, uthi yize noma wonke amaqembu epolitiki ekhuluma ulimi olufanayo, ikakhulukazi uma sekusondele ukhetho, okwehlukile ngeda wukuthi iyakholelwa kulokhu ekushoyo futhi inezinhlelo esezikhona ezizoqinisekisa ukuthi konke ethembisa ukukwenza uma inqoba ukhetho esifundazweni kuzofezekiswa ngempela.
Engxoxweni ekhethekile abenayo NELANGA Langesonto, uveze ukuthi indawo akhulele kuyona esemakhaya ibe nomthelela omkhulu ekutheni agcine esezibandakanya nezombusazwe ngoba ubekhalela ukubona ushintsho.
Uthi kusukela esengumfanyana, efunda amabanga aphezulu enkosi Bhekuzulu High, ubevele eseqalile ukuba nothando lwezepolitiki kodwa obekwehlukile ngaye wukuthi ubekholelwa ekutheni inhlangano yezepolitiki kakumele imele abathile, kepha kumele ilwele ukuhlanganisa izizwe zonke, nathi yikho okwenze waqoma IDA.
Uthi ngisho esefika ethekwini ngokwemfundo uqhubekile noku
ba nothando lokwenza ushintsho kwezepolitiki, ushintsho olwehlukile kunolwenziwa ngezinye izinhlangano. Ukhuluma ngoshintsho oluhlomulisa bonke abantu kungakhathalekile ukuthi ngabaluphi uhlanga. Ukhuluma angahlonizi ngokubaluleka kwemfundo okuyinto nakuye ehamba phambili njengoba kuyimanje ethi umatasa ngokubhala isicelo sokwenza iziqu zobudokotela kwibusiness Administration.
Unemaster’s Degree kuyona ibusiness Administration (MBA) ayithole e-university of Kwazulu-natal.
Uphinde abe nenational Diploma in Electrical Engineering, yibachelor of Technology in Engeneering Management.
Izifundo ZEMBA uthi uzenze esebenza ngokugcwele njengomholi waleli qembu, phezu kwalokho ubenezifundo abezenza phesheya kwezilwandle zeStrategic Planning and Political Leadership, azenze egermany.
Ngo-2014 wenze izifundo zeGood Governance and Transparency e-united Stated of America (USA).
“Kimina imfundo ibaluleke ngendlela eyisimanga kanti ngiyakholelwa ekutheni kasikwazi ukucasha ngokuthi simatasa noma isikhathi kasikho.
“Uma into unothando lwayo isikhathi uyasakha, ikakhulukazi uma ibalulekile kuwena. Ngelinye ilanga ngiyafisa ukuba kube neqhaza engilibambayo ngokwezemfundo ukuyisa leli lizwe phambili. Kasikwazi ukuthembisa abantu ikusasa elingcono sibe sisehlulwa wukuzithuthukisa thina ngemfundo. Ukufunda kuba nomthelela omkhulu emsebenzini owenzayo,” kusho umnu Mncwango.
Kasikwazi ukuthembisa abantu ikusasa elingcono sisehlulwa wukuzithuthukisa.