Umsubathi ucikwe YI-ASA waduba IKZN
Ukhala ngokwenzelwa phansi kumele alibangise edenmark
Ebika esegermiston
UMSUBATHI wakwazuluNatal udube ukumela isifundazwe emidlalweni yesizwe Medical Fund and 3Sixtylife Senior Track & Field Championships eqale ngoLwesine yasongwa ngomgqibelo egermiston Athletics Stadium, egauteng.
Ujenet Mbele ubeseqenjini lesifundazwe eliya kulo mqhudelwano, lapho kukhethwe khona iqembu lesizwe elizokuya kwi-international Association of Athletics Federations (IAAF) World Championships ngomandulo (September) edoha, eqatar.
Kuzokhumbuleka ukuthi lo msubathi ubeseqenjini lesizwe ebelikwi-iaaf Cross Country Championships kodwa wagcina engahambanga.
Ujenet usole i-athletics South Africa (ASA) ngokumenzela phansi okwenze wagcina engayanga edenmark.
Uthi I-ASA kayimhlelelanga i- visa yokuya edenmark. Kuthiwa lo msubathi simdine kakhulu isenzo SE-ASA wabe esenquma ukungazihlanganisi nemidlalo yayo (I-ASA).
Itask Team esebenzisana noray Reddy ongumlawuli ozimele weKwazulu-natal Athletics (KZNA), itshele ILANGA Langesonto ukuthi ujenet uthe ngeke azihlanganise
nemidlalo YE-ASA emuva kokushiywa ngaphandle.
Umandla Dlakadla oyilungu letask Team, ukuqinisekisile kuleli phephandaba ukuthi ujenet uthe ngeke azihlanganise NE-ASA ngoba ucikwa yisenzo sokumshiya ngaphandle kuyiwa edenmark.
Uhezekiel Sepeng obhekene nabagijimi kwi-asa, uthe kabanankinga nesinqumo sikajenet.
Uthi nguyena owaziyo ukuthi ufunani ngempilo yakhe.
Mayelana nodaba lwasedenmark, uthe bonke abasuthi ababeya khona babizelwa kwi- fitness test, ngemuva kwalokho banikwa izincwadi zokuyokwenza ama- visa. Uthi akazi ukuthi kwenzekani ngoJenet.
Omunye wabasubathi obeseqenjini ebelisedenmark, ukuqinisekisile ukuthi bonke abasubathi babizelwa kwi- fitness test babe sebenikwa izincwadi zokuyokwenza ama- visa ezifundazweni zabo.
Uthi wethuka uma sebehamba bethola ukuthi ujenet akekho eqenjini lesizwe.
Ujenet uthe iyamcika kabi le nto eyenziwe YI-ASA, akafuni ukukhuluma ngayo. Uma ebuzwa ukuthi kwenzakalani bekwi- fitness test ngoba kuthiwa bonke banikwa izincwadi, uthe makubuzwe I-ASA.
Uma singena kulo mqhudelwano, uqale kahle kakhulu kwazise ubungenelwe ngabasubathi abaningi abahlonishwayo kuleli.
Phakathi kwabo bekukhona ucaster Semenya ongaphoxanga njengoba ebe yingqwele ye-5 000m.
Usimon Magakwe wenze njengoba bekulindelekile enqoba i-100m.
Umagakwe utshele abezindaba ukuthi uyibheke ngabomvu imidlalo yeworld Championships yanonyaka. Uthe ngontulikazi (July) uzogijima imidlalo eminingi phesheya kwezilwandle ukuze afike kule midlalo esesimweni esihle.
“Okunye engikubheke kakhulu nonyaka yimidlalo yama-relay ezokuba ngenyanga ezayo ejapan. Abasubathi bakuleli basezingeni eliphezulu kakhulu, nginethemba lokuthi sizokwenza kahle kulo mqhudelwano. Kukhona u-akani Simbine, u-anaso Jobodwana, uclarence Munyai, ucedrick van Wyk ukubala nje abambalwa,” kusho umagakwe.
Uluvo Manyonga ube yingqwele yelong Jump.