Uthandaze ngokujulile 'eboniswa' ngokufa
Umdlali wasemalawi uchaza ngokwenziwe ngupapy esezoshona
KUVELA ukuthi uthandaze kwaze kwavuka uzakwabo upapy Faty kanti uboniswa ukuthi useyahamba emhlabeni. Lo mdlali waseburundi ubesegijima kwimalanti Chiefs yaseswaziland.
Ufaty ugcine enqotshwa yisifo senhliziyo osekunesikhathi eside axwayiswa ngaso kusuka esadlala kwibidvest Wits eyamxosha. Uye nakwiroyal Eagles engamsayinisanga emuva kokuba ithole ukuthi unalesi sifo kanti ireal Kings imkhombe indlela emuva kokuba equleke komunye wemidlalo yayo.
Ufaty uquleke enkundleni washona ngolwesine ntambama ezakhe zibhekene negreen Mamba koweligi yaseswaziland.
Ushayeke phansi umdlalo unemizuzu ewu-20 uqalile.
Uphuthunyiswe esibhedlela kodwa wafika khona eseshonile.
U-innocent Jere wasemalawi
odlala ophondweni lwesokunxele emuva kwichiefs, ekhuluma naleli phephandaba, uthi izinto ebezikhulunywa yilo mdlali zikhombisile ukuthi kukhona into abeseyizwa.
“Upapy bengilala naye endlini eyodwa, kumanje kangikakholwa ukuthi akasekho. Kulesi sikhathi esincane engisihlale naye kuningi engikufunde kuyena. Okokuqala nje, ungifundise ukubambisana njengoba besibuye sisebenzise ucingo olulodwa naye.
“Ukhombisile ukuthi uzosishiya emasontweni ambalwa edlule, uthe ufuna ukuyogunda isihluthu, ngambuza ukuthi ugundelani ngoba iyamfanela le nto ayenzile, wathi akazizwa nje kahle iyamsinda, akafuni uma kwenzeka efa aqale phansi alokhu egundwa.
"Ngizitshele ukuthi uyazidlalela nje, nangempela wabuya esegundile,” kusho lo mdlali.
Uthi ngosuku olwandulela olomdlalo, ubengesiyena lo Faty amjwayele.
“Uphaphame kwesikabhadakazi wavele wathandaza okuyinto abengavamisile ukuyenza. Uthandaze isikhathi eside kwaze kwabe uyaqeda kwayima ngilala.
"Ngakusasa sesidla isidlo sasekuseni, ngimbuze ukuthi kungani evele wavuka kwamabili nje, wathandaza wathi ubengazizwa kahle.
“Sifike enkundleni esesimweni esihle kanti kasazi ukuthi kuzovela lo mshophi. Namanje kangikakholwa ukuthi akasekho.
"Bengiqala ukubona into enjena, umuntu avele akweqe amehlo kuphele nje ngaye sibhekile. Kusazoba nzima ukukhohlwa lesi sigameko,” kusho ujere.
Ipremier Soccer League (PSL) ithathe isinqumo sokuhlonipha ufaty nabashone kuhlasele izikhukhula kuleli ngokuba kube nomzuzu wokuthula kuyona yonke imidlalo yezigaba ezingaphansi kwale nhlangano kule mpelasonto.