UMDLALI WE-EAGLES UGQUGQUZELWA NGAMAZWI KAMUFI USIKHAKHANE

UGQUGQUZELWA ngamazwi omqeqeshi ongasekho emhlabeni umdlali weroyal Eagles enukelwa yisicoco senational First Division (NFD) eyisango lokungena kwiAbsa Premiership.

Udiego Brown ( osesithombeni) odlala esiswini kwi-eagles utshele leli phephandaba ukuthi kunkenteza amazwi karoger Sikhakhane kuyena njengoba sezibheke entanjeni. Uthi usikhakhane ubehlala ekugcizelela ukuthi kumele amasokisi anyuke kakhulu kunakuqala uma sekubhekwe entanjeni. Usikhakhane ushone kusanda kuqala le sizini emuva kokuxinwa wukugula.

Ubecija i-eagles. Indawo yakhe ithathwe ngusazi Ngubane nobafana Nhlapo okubukeka besayibambe ngendlela esezingeni elicokeme kwazise kumanje le kilabhu ibambe isibili esicongweni emuva kwestellenbosch. Bahlukaniswe ngamaphuzu amabili kanti sekusele imidlalo emibili ukuba kusongwe isizini. Istellenbosch inamaphuzu angu-52 kanti i-eagles inangu-50.

I-eagles izolwela ukuthola amaphuzu agcwele uma isibhekene newitbank Spurs esigengcwe yizembe kwinfd. Umdlalo wala makilabhu unamuhla ngesonto ngo-15h00 echatsworth Stadium, ethekwini. Ngesikhathi esifanayo istellenbosch izokube ishukana necape Umoya United e-university of Western Cape.

Ubrown uthe: “Usikhakhane ubehlale ekugcizelela ukuba sisebenze kanzima ngaso sonke isikhathi ukuthola impumelelo. Sizimisele ngokujabulisa abalandeli bekilabhu nezikhulu. Kungaba yintokozo nakimina siqu ukuba yingxenye yesikwati esizonyusela i-eagles esigabeni esikhulu.

“Kasikho esinye isipho esingasipha abaphathi bekilabhu ukubabonga ngokusiphatha kahle ukudlula esokunyusa ikilabhu. Kumele sishaye ispurs ngamagoli amaningi angase asisize ekugcineni. Ngiyazi ukuthi umqeqeshi wabo (ukagisho Dikgacoi) usuka kithina, kuningi okungamjabulisa uma enqoba lo mdlalo, futhi ngiyakuqonda ukuthi ngesikhathi esasebenza ekilabhini wakwazi ukunqoba imidlalo emithathu ilandelana okwenza abenolwazi olunzulu ngathi.”

Isiyonke imidlalo YENFD enamuhla ngesonto imi kanje:

Evolkswagen Dobsonville: Maccabi FC vs Mbombela United 15h00.

E-athlone: Ajax Cape Town vs Uthongathi FC 15h00.

Echatsworth: Royal Eagles vs Witbank Spurs 15h00.

Emhlathuze Sports: Richards Bay vs Pretoria University FC 15h00.

Ekameelrivier: TS Galaxy vs TS Sporting 15h00.

E-university of Western Cape: Cape Umoya United vs Stellenbosch FC 15h00.

Esugar Ray Xulu: Real Kings vs Ubuntu Cape Town 15h00.

Emakhulong: Jomo Cosmos vs Tshakhuma Tsha Madzivhandila 15h00.