U-ekstein uqhathwe 'amakinati' nechiefs
Kuthiwa ubesefuna ukuhola u-r200 000 hhayi u-r100 000
KUVELA iqiniso ngesizathu esenze ikaizer Chiefs yagcina ilaxaze umdlali wayo obengaconsi phansi kubalandeli bale kilabhu.
Ichiefs ithuse abathandi bebhola ngolwesine imemezela ukuthi inqamule inkontileka kahendrik “Pule” Ekstein, ekagustavo Paez nekakgotso Malope.
Kuzokhumbuleka ukuthi leli phephandaba like labika ukuthi liyacikizela ikusasa lika-ekstein njengoba bekungezwanwa ngendaba yenkontileka ezophela uma kusongwa isizini.
Emasontweni ambalwa edlule, liveze ukuthi seligqabukile igoda phakathi kwechiefs nopaez kwa
zise ubesefana nento engekho kule kilabhu njengoba isikuqinisekisa ngolwesine.
Leli phephandaba lithole ngemithombo yalo ukuthi isizathu okuyisona esenze ukuba u-ekstein agcine ehlukene nale kilabhu emkhulisile, wukuthi ubebona imxhaphaza ngeholo ngoba nakhu ekhulele kuyona bese kuthi abantu abafikele kuyena bayikhe ngamafosholo imali.
“Into eyenze lo mfana wagcina ehlukana nechiefs wukuthi ubewubona umncane umholo ka-r70 000 abewuhola zinyanga zonke kwazise bewungafiki kuyena unjalo ngoba bekusuke kusazobanjwa intela nenye nje imali.
Ubefuna u-r200 000 ukuze elule inkontileka, ichiefs yanqaba yathi nasemandulo akekho nje umuntu owake wakhushulelwa umholo ngalolu hlobo.
“Ibifuna ukumnika u-r100 000 wawunqaba.
"Into eyenze wawunqaba wukuthi kunabantu abanga nabo indawo abangadlali kwakudlala abahola yona le mali ayifunayo bebe behleli ezihlweleni, yingakho ebone kungcono ukuba kuhlukwane,” kusho umthombo ozazi zonke ezeChiefs.
Imizamo yokuthola ubobby Motaung oyimenenja-jikelele yechiefs ukuba aphawule ngalolu daba iphunzile.
Ekhuluma kwesinye isiteshi somsakazo, uthe ngeke akwazi ukuyidalula imininingwane ephelele ngokuhlukana kwabo noEkstein kodwa wakubeka kwacaca ukuthi kabavumelananga ngemali.
“Udaba oluthinta imininingwane yenkontileka yomdlali yinto ephakathi kwakhe nomqashi, kawukwazi ukuvele uyibhadlaze nje esidlangalaleni.
"Kasivumelananga ngokuthile naye kwabe sekuhlukwana.
"Ikilabhu ibisafuna ukumgcina kodwa ngenxa yokungavumelani ngabekudinga sabe sesihlukana,” kusho umotaung emsakazweni.