BAPHAWULA NGOMGUBHO WOSUKU LWENKULULEKO
MANTOMBI NGCOBO WASENDWEDWE: "Siyakuthokozela ukuthi sathola inkululeko. Benginengane ehola imali yesibonelelo sikahulumeni nokuyimali ebingisiza kakhulu. Njengoba isikhulile nje, kayisekho leyo mali, ngiqhukuluza ngokuba ngidayise.
"Kunzima kakhulu njengoba uhulumeni ehluleka wukulawula abadayisi. Udedela abantu basemazweni angaphandle ukuba bahambe bezidayisela emgwaqweni thina sibe sikhokhela ama- permit.
Ngokusho kwakhe kwalawo ma- per
mit ayinkinga ngoba abakutholi ukuvikeleka, indawo abasebenza kuyona igcwele amaphara, abantu abafuni ukusondela eduze kwabo. Njengoba bekukhona izimvula kayikho imali ebingena. Uthi bahlale kwaze kwaba sebusuku kodwa bangathola lutho.
"Ngiyafisa uhulumeni ake asibhekele. Abantwana bethu bahleli emakhaya, bayalamba, imisebenzi kayikho. Usuku olunje luletha izinyembezi ngoba kasikakhululeki ngokwenele, inkululeko siyibukela kude."
NDUMISO DUBE WASEMAYVILLE:
"Yigama nje ukuthi kukhona ifreedom Day. Lolu suku luzifanela nezinye kimina. Ngiyafisa ukuthi ngabe ngihleli ekhaya nomndeni wami, angikwazi ngoba kumele ngizame impilo ngokudayisa. Ayikho nento evotelwayo. "Mina ngeke ngivote ngoba abantu bacebisana bodwa, badle izimali. Ayikho nento asisiza ngayo uhulumeni njengoba singabadayisi kodwa kufuneka imali kuthina." Cosmos Mthiya wase-escourt: Yebo inkululeko siyitholile kodwa ihlomulisa abathile. Abantu abaphansi ngokwezinga lempilo basaqhubeka nokuhlupheka.
"Kukhona okubonakalayo, kepha kusekuningi kakhulu okudinga ukuba kwenziwe. Sisengaphansi kwengcindezi yabelungu, izinto eziningi zilawulwa yibona. Umthetho wakuleli uvikela kakhulu izigebengu nabantu abavela emazweni angaphandle. Uma behweba ngezidakamizwa, kababoshwa. "Okuhle siyakubona nokuwukuvuleka kwamathuba emisebenzi kwabambalwa, kodwa kuye ngokuthi wazi bani. Abangavoti ngeke ngibagxeke, yize mina ngizovota."
Nonqaba Cekeshe wasequeenstown nombali Nkabinde wasepinetown: "Siyalugubha nje lolu suku kepha asikhululekile ngokwenele. Kasijabule ngokuthi sisaphoqeleka ukukhuluma isingisi kepha zikhona izilimi zethu thina bamnyama.
"Size sihlekane sisodwa ngenxa yalokhu. Ngisho izingane zethu sizikhulisa ngendlela ezokwamukeleka kubelungu, zifaka ama- weave zikhanyisa nesikhumba. Kwankolo esikuyo kasizibuzi ngayo ukuthi iqhamuka kuphi, sithatha njengoba kunjalo.
"Ukukhululeka komuntu omnyama kusho nokukhululeka komqondo wakhe. Singakuncoma ukuthi kuyo le minyaka, sekuvuleleke iminyango ebivalekile kubantu abamnyama njengokungena emanyuvesi nokuya emabhishi, kodwa kuningi kakhulu okusamele kwenziwe, kwandiswe amathuba omsebenzi."