Ushiya igagasi ujr de Rocka
UYASHIYA kwigagasi FM ujunior Mzizi odume ngelikajunior De Rocka njengoba lesi siteshi senze izinguquko ezimenyezelwe ngolwesihlanu.
Lo DJ obenza uhlelo lwe- hip hop ngolwesine kusihlwa (08pm-10pm) nguye kuphela
ongekho ohlwini olusha lwabasakazi balesi siteshi. Kuvela ukuthi uhlelo abelwenza selunikezwe UDJ Lab no-asante abazobuye bangene ngomgqibelo kusihlwa (07pm-10pm). Ebuzwa ngalokhu ujunior uthe akaxoshwanga, kodwa uzesulele ngoba efuna ukugxila kweminye imisebenzi afuna ukukhula kuyo. “Angikwazi ukugxila kwimininingwane kodwa ngisule ngoba kukhona la ngibheke khona,” kusho yena kafushane. Lo DJ ube sematheni ezinyangeni ezedlule exabana nonina wendodakazi yakhe, untando Duma ngendaba yesondlo somntwana wabo. Olunye uguquko oluqaphelekile ngolokulandwa komculi umondli Ngcobo, ozosakaza uhlelo olungena ngomsombuluko (08pm-10pm) lomculo weafro Umondli uthe bekuvele kusenhliziyweni yakhe ukungena emsakazweni, kodwa okumjabulisa kakhulu wukuthi nguyena ozobe ephethe izintambo ngomculo odlalwayo ohlelweni. Olunye uguquko olugqamile ngolokususwa kukamfundo “The Dazzling One” kolwasemini (09-12) washiywa nolwangesonto kuphela.
Lolu akhishwe kulona seluzokwenziwa nguzisto nokhulekani Mbambo obengena ezintathakusa nsuku zonke. Okucacile wukuthi ukuhamba kukamzokoloko osesokhozini FM, kuphoqe ukuba zenziwe lezi zinguquko njengoba esikhaleni sakhe ekuseni, sekufakwe ufelix Hlophe.
Ukhaya "GC" Dladla obesakaza ngomgqibelo ntambama nodj Vumar, usezongena kolwasekuseni naye enza izimemezelo zomgwaqo elekelela ufelix nonjabs Zwane obevele ekhona.
Olwasemini (aphuma kulona ufelix) seluzobanjwa nguheazy nodj Lesoul obevele ekulo nosomahlaya uflymotion. Kazikho ezinye izinguquko ezinqala ezivelayo ngale kokulandwa kukadj Sphe Live, esiteshini somphakathi, ivibe FM ozongena kwesikabhadakazi (1am-4am).
Okhulumela lo msakazo, umnu Khulekani Shandu, uthe bahlukane kahle nojunior De Rocka futhi bazoqhubeka nokumeseka ebhizinisini lakhe lomculo. Uthe unomfundo bese kuphele iminyaka emithathu enza uhlelo abekulo, bebedinga abantu ababili abazolushayela base bebona lufanelwe yilaba ababafakile.
Mayelana nokuthi wukuhamba kukamzokoloko yini okuphoqe ukuba bashintshe izinhlelo ngokushesha njengoba bayaye bakwenze ngojune, uthe lesi kube yisinqumo sebhizinisi qha.