UKUSHIYWA NGABAZALI KUMVULE AMEHLO OPHASE NGAMALENGISO
UKUSHONA kwabazali bakhe esemncane kumuvule amehlo wayeka konke okomhlaba wagxila ezifundweni zakhe usanelisiwe Mboto (22) ( osesithombeni) wasephoenix ethekwini ogile izimanga waphase iziqu zakhe ngo-distinctions abawu21 edurban University of Technology (DUT) kwinational Diploma in
Public Relations.
Usanelisiwe uzothweswa lezi ziqu kusasa ngomsombuluko ophikweni olusendumiso emgungundlovu. Utshele ILANGA
Langesonto ukuthi abazali bakhe badlula emhlabeni efunda ugrade-7, eneminyaka ewu-12 ubudala. Ngesikhathi eshiywa ngabazali bakhe uthi yilapho kwamcacela khona ukuthi umhlaba ushintshile ngoba odade
wabo abangamawele nabo babeneminyaka engu-21 ubudala, kungekho abangakwenza ukuze impilo ihambe kahle.
“Isimo besingesihle ekhaya ngaze ngaphasa kabi umatikuletsheni wami ngo-2013, ngaphuthelwa yithuba lokuyokwenza iziqu zobuntatheli erhodes University ngoba bengingaphasanga kahle ekubeni sasikade samukeliwe isicelo sami. Ngihlale iminyaka emibili ekhaya ngizama ukuphucula izifundo zami, ngabe sengithola umsebenzi e-call centre. Ngaleso sikhathi bengibeka imali engango-r1 500 inyanga nenyanga ngibekelela ukuthi ngiyofunda. Bengingeke ngidlale ngesikhathi sami nginganaki izifundo ekubeni kuyimina ebengizifundisa ngoba uxhaso lukahulumeni ngiluthole emuva kwesikhathi eside,” kusho usanelisiwe.
Lo mfundi uphase ngo-cum Laude, waphinde wahlomula ngeDeans Merit Award. Uthi ukushona kukanina ngo-2008, noyise ngo-2012 kulethe usizi kakhulu ngoba kwabayibona beyizingane okwakumele bahlele amalungiselelo omngcwabo. Ngaleso sikhathi ngisho abafowabo nabo abangamawele babebancane kakhulu.
“Zonke lezi zinto zingiphazamise kakhulu empilweni yami kodwa okuyikhona okwenze ukuba ngingakwazi ukuthola ibachelor kumatikuletsheni wukuthi angiyiphasanga imathematics ngabe sengiyophucula yona e-icesa ethekwini.
"Nakuba bekunzima ukucosula emalini engango-r3750 ebengiyihola njalo ngenyanga ecall centre kodwa bengiyibeka ingxenye yayo ngoba bese ngizitshelile ukuthi le mali iyona ezokwenza ikusasa lami liqhakaze,” kusho usanelisiwe.
Njengamanje uqhubeka neziqu zeBtech kuwona lo mkhakha kanti usezinhlelweni zokuvula inkampani yakhe yezokuxhumana njengoba engakawutholi umsebenzi.