OWE-DA UGXEKA INKULUMO YEMEYA YETHEKU NGENHLEKELELE YEZIMVULA
UMHOLI we-da Kwazulu-natal umnu Zwakele Mncwango
( osesithombeni) ugxeka inkulumo yemeya yetheku, unkk Zandile Gumede, ngesibhicongo esidalwe yimvula esishiye kukhalwa ethekwini namaphethelo nase-eastern Cape.
Imeya ithe umonakalo odalekile awenziwanga ukungabi bikho sesimweni esikahle kwengqalasizinda okubandakanya kuyo nokungasebenzi kahle kwezitamkoko njengoba kunezinkonondo, abanye bekholwa wukuthi ukungasebenzi kahle kwazo kube nomthelela kwizinga lomonakalo. Ithe lokhu okwenzekile kuyimvelo.
Umnu Mncwango uthi bekungamele imeya ikhulume ngendlela evikela umasipala uma sekunesibhicongo esinje. Uthi izindlu ezidilikile zakhiwa yiwona umasipala, ngakhoke uma sezibulala abantu yiwona umasipala okumele uphendule.
“Uzandile ukhulume inkulumo evikela inhlangano yakhe. Abayeke ukucasha ngesithupha balungisele abantu izindlu, futhi kumele baphendule ngokwakha izindlu ezingekho esimweni, kanye nenkampani ababeyiqokile eyayakha lezi zindlu,” kusho umncwango.
Usho lokhu ngesikhathi evakashele emlazi ngolwesihlanu. Uthi okushaqisa kakhulu wukuthi izindlu zangasese, amanzi, kanye namapayipi akukho kule mizi.
“Kuyacaca ukuthi kwavele kwafakwa inkontileka yakha nje kungabizwanga onjiniyela ukuba bazobheka ukuthi indawo ikulungele yini ukwakha izindlu,” kusho umncwango.
Utshele abezindaba ukuthi yize noma umasipala ungeke ukwazi ukuvimba isimo sezulu kodwa ukube izindlu bezisesimweni esikahle ngabe umonakalo awubanga mkhulu ngale ndlela emlazi. Uthi ukube umasipala wafaka amapayipi, umonakalo ubungeke ube mungaka.
Unkk Busisiwe Nyawose (45) oyisisulu sale nhlekelele uthi usethuthe izingane zakhe waziyisa kubo ngoba uyesaba ukuhlala nazo kule ndawo, ubona ukuthi indlu izodilika noma nini. Uthi uzimisele ukuya noma yikuphi lapho umasipala uzobayisa khona.
“Angisakhathalele ukuthi umasipala usitholela kuphi indawo, inqobo nje uma kuyindawo ephephile,” kusho yena.
Isibalo sabashonile kule nhlekelele singaphezu kuka-80 kanti yinqwaba esale dengwane ingenamakhaya. Njengamanje abanye bahlaliswe emahholo omphakathi. makhoba@ilanganews.co.za
~ Bheka nasekhasini 12