UMUNYU KU-MAX KUVULWA KABUSHA INDAWO YAKHE
UVUKWE wumunyu, wahlengezela izinyembezi umax Mqadi, ongumnikazi wendawo yobumnandi esemlazi, imax’s Lifestyle, ngesikhathi kunomcimbi wokuvulwa kabusha kwale ndawo njengoba kunezingxenye zayo ebezakhiwa, okubalwa kuzo nendawo yokupaka izimoto ngolwesine.
Inkulumo ayethule kulo mcimbi, obuhanjelwe yizicukuthwane okubalwa kuzo izikhulu zikahulumeni nosomabhizinisi abadumile, ibigxile emlandweni wale ndawo yakhe azigqajayo ngayo.
Ukhulume waze wafikelwa yisibibithwane, kwehla izinyembezi.
Kuzokhumbuleka ukuthi kule ndawo kwake kwaba nesigameko sokubhodloka engxenyeni ethile, kwalimala abantu.
Kwizicukuthwane ebezikulo mcimbi kubalwa undunankulu waKwazulu-natal, umnu Sihle Zikalala, ngusihlalo we-orlando Pirates, udkt Irvin Khoza, ngusihlalo welamontville Golden Arrows, unkz Mato Madlala, nemeya yetheku, umnu Mxolisi Kaunda.
“Ngicela ukuniphathisa umphako Mnu Zikalala nawe Mnu Kaunda, ukuthi nisikhuzeleni abantu abavala imigwaqo la emlazi. Le nto iphazamisa izivakashi ezize emlazi, zifike zithole ukuthi akungeneki ngenxa yabantu abavale imigwaqo. Ngicela ukukubonga baba ukhoza ngokufika uzovula le ndawo, lokhu kusho lukhulu kumina. Ukhoza ngimmeme ngoba ungubaba engibukela kuyena yonke into, futhi ungumngani wami,” kusho yena.
Udkt Khoza ubonge umax ngesibindi abe naso sokukhulisa ibhizinisi lakhe elokishini, nangezikhathi ezinzima.
“Kuningi esikwenza ngokufana nomax. Uqale indawo yakhe ngo2002, okuyisikhathi nami engiqale ngaso ukuba ngusihlalo wepremier Soccer League (PSL). Uzalwe wakhululela elokishini, emlazi, nami ngizalwe ngakhulela elokishini, e-alexandra,” kusho yena.
Umnu Zikalala uthe uhulumeni wesifundazwe uzibophezele ukukhululisa umnotho wasemalokishini. Unxuse ukuba kube nokusebenzisana phakathi kwemax’s Lifestyle, neYadini Lounge kamnu Jabulani Zama, zingaqhudelani.
Umnu Kaunda naye uthe umasipala uyazibophezela ekwesekeni umnotho wasemalokishini.
hlongwaj@ilanganews.co.za