KUQOPHEKE UMLANDO ECHIBINI
KUGCOTSHWE ababhishobhi abangu-23 enkonzweni yomgidi wokuvala unyaka obengumlando ebandleni lasechibini, ifather Masango St John’s Apostolic Faith Mission in South Africa, obuwenzelwe eclermont entshonalanga yetheku ngempelasonto edlule.
Uvuthondaba kube wukwenyuselwa ebubhishobhini kukankk Konie Masango oyinkosikazi kaMfu Tsehla Stephen Masango ongumzukulu wokuqala ka-archbishop Dkt Petros J Masango, umsunguli webandla, bobabili abangasekho.
Lo mgidi ube ngumlando njengoba bekuqala ukuba wenzelwe ethempelini laseclermont. Kuyona yonke le minyaka edlule ubuwenzelwa ethempelini laseLekokoaneng elesotho.
Kuthe ngokwedlula emhlabeni nyakenye kwenhloko yebandla, u-archbishop Thabang Matsoso, nowakwakhe umama Archbishop Malimakatso Matsoso kwathathwa isinqumo sokuba lo mgidi, neminye emibili, yenziwe eclermont.
Isinqumo sokuba le migidi emithathu yenziwe eclermont sibhebhezelwe nawukungaboni ngaso linye okuqubuke emndenini wakwamatsoso ngemuva kokwedlula emhlabeni kwabazali.
Kubabhishobhi abagcotshiwe abayi 10 bangobaba, kuthi abayi 13 ngomama. Iningi beliqhamuka emathempelini ase-eastern Cape.
Ngaphandle kwababhishobhi, kugcotshwe nobaba befundisi nomama befundisi. Sebebonke abefundisi abebekhona bebeyi 146. Abagqokiswe amajazi namabhande babe ngu 24. Ngesonto ekuseni kubhabhathiswe abangu 81, bebhabhathiswa ngokufakwa echibini.
Ephawula umbhishobhikazi Masango uthe: “Ngijabule kakhulu ngokwenzekile. Ngineqiniso ukuthi umyeni wami, umkhulu nogogo bajabule kakhulu ngalokhu kukhushulwa. Sizoqhubeka sibasebenzele abaPhrofethi ngamandla ethu onke.”
Umbhishobhi Phanduva waseNqamakwe, ongomunye wababhishobhi abasophondweni lomkhankaso wokusimamisa ithempele laseClermont, uthe:
“Indlela lo mgidi oqhubeke ngayo angingabazi ukuthi ubaba Masango nomme Anna bebekhona msalofu bezibambele bona umsebenzi, wukuthi nje thina besingababoni ngamehlo enyama, kodwa sibevile ngomoya.” knowledge.simelane@ila nganews.co.za