Kumsizile ukukhulela emndenini webhola
UPHUMA emndenini kanobhutshuzwayo udaylon Claasen (29) ogijima kwimaritzburg United eqhathwe nekaizer Chiefs kwi- semi final yetelkom Knockout namuhla ngesonto ngo15h00 embombela Stadium, empumalanga.
Lo mdlali udabuka e-olabama, eklerksdorp, enorth West kodwa ushiye kule ndawo eneminyaka engu-11 ubudala wayohlala ecape Town.
Kule ndawo yaseklerksdorp kuphuma kuyona ugert Schalkwyk oke wagijima kwikaizer Chiefs nophilemon “Chippa” Masinga ongasekho owaduma kwijomo Cosmos nakwibafana.
Uclassen uthi ukhulele ekhaya lebhola kwazise nomalume wakhe ubedlalela i-orlando Pirates okwenza impilo yakhe yokudlala ibhola yaba lula kakhulu ngoba wonke umuntu ekhaya ubethanda ibhola.
Ufunde ebrackenfell Primary ngaphambi kokudlulela ehoîrskool Brackenfell High School aqede khona umatikuletsheni ngaphambi kokuya phesheya.
Uclaasen uqale ukudlala ibhola emazingeni aphansi kwileicester City wadlulela kwivasco Da Gama ngaphambi kokuthathwa yi-ajax Cape Town ngo-2002 kuya ku-2005.
Ngo-2008 uthathwe yi-ajax Amsterdam yasenetherlands ukuyodlala kuyona ngo-2008.
Uhlale iminyaka emibili kule kilabhu. Ube esethathwa yilierse ngo-2010 wayidlalela iminyaka emithathu.
Ngo-2014 ujoyine ilech Poznari nakhona ahlale iminyaka emithathu ngaphambi kokuqoma i-1860 Munich. Ugcine ngokubuyela kuleli ngo-2017 ezodlalela ibidvest Wits adlale kuyona amasizini amabili ngaphambi kokujoyina imaritzburg United.
Ingxoxo kaclaasen NELANGA Langesonto ( I/ L) ngempilo yakhe yangaphandle kwenkundla ihambe ngalolu hlobo:
I/ L: Ukhulele ekhaya elinjani?
Claasen: Ngikhulele ekhaya elifudumele. Yize besibaningi kodwa besikwazi ukuthola esikudingayo.
I/ L: Ungumuntu onjani?
Claasen: Ngingumuntu okhonze ukuhlala kakhulu nabantu futhi kangizwani nezinto ezibhedayo.
I/ L: Basekhona abazali bakho?
Claasen: Ngenhlanhla enkulu basaphila bobabili. Ngizalwa nguben Claasen (ubaba) nobrunette (umama) nabafowethu ababili ukylan norylan. Okungimangazayo ngabo bayazithanda ezemidlalo ngoba omunye udlala ibhola lo mbhoxo.
I/ L: Yikuphi osafisa ukukwenzela abazali bakho?
Claasen: Wukuqhubeka nokubenzela izinto ezinhle kwazise okuningi ngikwazile ukubenzela khona.
I/ L: Usushadelwe?
Claasen: Yebo futhi ngiyamthanda umuntu engiphilisana naye. Kangikabi nazo izingane kwazise umqondo wami ngisawubeke ebholeni.
I/ L: Uyakwazi ukupheka?
Claasen: Hahaha...cha kodwa ngenhlanhla ngiyakwazi ukupheka ukudla okudliwa yimina. Engikwaziyo ukukwenza yinkukhu, ipasta namakhowe.
I/ L: Ngabe usichitha kanjani isikhathi sakho uma ungadlali ibhola?
Claasen: Isikhathi esiningi ngisinika umndeni wami kwazise kangisitholanga isikhathi sokuhlala nawo. Okubi wukuthi kangibaboni ngaso sonke isikhathi.
I/ L: Hloboluni lomculo olukhonzile?
Claasen: Ngiwuthanda ukufa umculo opholile ikakhulakazi okachris Brown.
I/ L: Ngabe akhona ama- soapie owathandayo?
Claasen: Yebo, kodwa isikhathi esiningi ngisichitha ngokubuka amadocumentaries. Ngaphambi kokuhamba bengibuka igenerations nebackstage.
I/ L: Hloboluni lwesiqholo osisebenzisayo?
Claasen: Yiterre Hermes. Okuhle ngayo wukuthi ngaso sonke isikhathi uma ngiyifakile ngithola ukunconywa.
I/ L: Yisiphi isilwane osisabayo?
Claasen: Ngiyisaba ukufa inyoka.
I/ L: Yini eyokuqala ovuka uyenze ngaphambi kokuya kozivocavoca?
Claasen: Ukuthandaza kwazise ngikhule ekhaya elikholwayo bese ngixubha ngaphambi kokudla i- cereal ngibhekane nezinkinga zosuku.
I/ L: Uphatha nhloboni kamakhalekhukhwini?
Claasen: Yi-iphone 8 kwazise wuhlobo olukwazi ukwenza konke engikudingayo.
I/ L: Ngabe ukhona ezinkundleni zokuxhumana i- twitter, facebook kumbe i- instagram?
Claasen: Yebo, ngikhona kuzona zontathu izinkundla zokuxhumana.
I/ L: Utshabaza ngohlobo olunjani lwemoto?
Claasen:
Ngebhadi elikhulu kanginayo imoto kwazise imali yami eningi ngiyafake ekukhuliseni impilo yami uma sengiyeke ukudlala ibhola.
I/ L: Usebenzisa ikhokho elinjani?
Claasen: Yi-nike Mercurial ingiphatha kahle kakhulu.
I/ L: Yimuphi umbala owuthandayo?
Claasen: Ngumbala oluhlaza okhanya kuhle kwesibhakabhaka.
I/ L: Yimaphi amazwe akuhlabe umxhwele usagijima phesheya kwezilwandle?
Claasen: Yize ngiwahambile amazwe phesheya kwezilwandle ngokudlala ibhola kodwa ngithanda ibelgium nenetherlands.
Kungisize kakhulu ukudlala phesheya ngoba kwenze ngaba nesithombe esihle ngamakilabhu namazwe nokuqonda usikompilo nokuphila kwabantu bezinhlanga ezahlukene.
I/ L: Yiziphi izinhlelo onazo uma usubeke amakhokho ethala?
Claasen: Ziningi izinhlelo enginazo.
Sekukaningi ngibuka isimo enzima ephilwa ngabadlali bebhola uma sebephayeke ukudlala.
Lokhu kwenza ngisebenzele ikusasa. Ngibheke ukuqala ibhizinisi lokudayisa izindlu. Nokho nokuqeqesha abafana abancane nginalo uthando lwakho.
I/ L: Uma ungase unikwe isikhundla sokuba ngumengameli yikhuphi ongafisa ukukushintsha?
Claasen: Kangikaze ngicabange lokhu indlala yiyona into ebhoke kakhulu lapha eningizimu Afrika.
Ngiyazi ukuthi uhulumeni wakuleli uzama ngazo zonke izindlela ukuguqula lesi simo futhi ngiyakuqonda ukuthi amathuba omsebenzi mancane.
I/ L: Uthini umlayezo wakho entsheni?
Claasen: Kumele intsha iqikelele ukuthi isikole iyaqinisa kusona kwazise impilo yasebholeni imfishane kakhulu.