ESKHALENI:
KUMELE ibe yisibonelo imaritzburg United emakilabhini akwazuluNatal njengoba iyiqale kabi isizini entsha kodwa manje isethubeni lokuqukula inkomishi yetelkom Knockout.
Imaritzburg izodudulana nemamelodi Sundowns kowamanqamu walo mqhudelwano ngomgqibelo womhla ka-14 kwephezulu emoses Mabhida Stadium, ethekwini.
Iteam of Choice iyivule ngenothi eliphansi le sizini kangangoba bese kunezinkulumo zokuthi angase akhonjwe indlela u-eric Tinkler ongumqeqeshi wale kilabhu.
Ukuhlula ikaizer Chiefs ngo-2-1 ngeledlule embombela Stadium, kuyizinkomba zokuthi imaritzburg izimisele ngokundizisela phezulu ifulegi lesifundazwe kulo mqhudelwano. Akumele kufihlwe ukuthi umbango wale nkomishi uphakathi kwekwazulu-natal negauteng njengoba idowns izinze etshwane.
Yize imaritzburg ingaqinile kangako ngokwesikwati nxa iqhathaniswa nesundowns, kodwa akumele umphakathi ukhohlwe yinkulumo kakaizer Motaung ongusihlalo wechiefs lapho athi khona ikilabhu ekhipha ezakhe kwi- semi final, ivamise ukuba yizingqwele zaleyo nkomishi esuke ibangwa.
Eqinisweni nje, bebebancane kakhulu nxa bebekhona abebecabanga ukuthi iteam of Choice ingaguqisa ichiefs phambi kwezinkumbi zabalandeli bayo.
Nokho-ke abanye bazokhumbula ukuthi imaritzburg ijikele i-ajax Cape Town kanzima inganikwa lutho iyincisha ithuba lokuba yizingqwele ze-absa Premiership ngo-2011.
Bese kuhlelwe imicimbi eyahlukene ecape Town yokubhiyozela ukudla ubhedu kwe-ajax, kodwa kwagcina kubhiyozwa esoweto ngemuva kokuba i-orlando Pirates seyehlule ilamontville Golden Arrows kowokugcina weligi.
Yize isundowns ilolongwa yingwevu engupitso Mosimane futhi esike yahlabana ngecaf Champions League, kodwa ngeke angatshazwa amagalelo katinkler.
Utinkler kusabalwa iminyaka engumqeqeshi ozimele, kodwa usekwazile ukunqoba izinkomishi ezimqoka.
Unqobise icape Town City itelkom ngesizini yayo yokuqala ibunjiwe.
Uphinde wanqoba IMTN8 nesupersport United. Ufake ipirates kowamanqamu wecaf Confederation ngo-2015 baguqiswa yi-etoile du sahel yasetunisia, waphinde wafaka isupersport kowamanqamu walo mqhudelwano baguqiswa yitp Mazembe yasedemocratic Republic of Congo
(DRC) ngo-2017.
Amagalelo alo mqeqeshi akubeka kucace ukuthi angakwazi ukuqhuba ngempumelelo le kilabhu yakwazulu-natal kulo mqhudelwano.
Iteam of Choice yiyona kilabhu yokugcina yakulesi sifundazwe engene kowamanqamu njengoba ihlulwe yiFree State Stars kubangwa inedbank Cup. Ngaphezu kwalokhu, lesi sifundazwe sigcine ukujabulela inkomishi ngo-2009 i-arrows inqoba IMTN8 iqhutshwa ngumanqoba Mngqithi.