Ungishiya ayohlala nonina wezingane inyanga yonke
IMIZWA YAMI AYISAMEMUKELI LO MUNTU
NGINGOWESILISA, ngibambe owesifazane engithandana naye ukuthi uyajola, ngambuza wavuma, ekhala, ngamxolela. Inkinga wukuthi ayidluli le nto ekhanda lami, noma sesilala imizwa ayimemukeli. Ngenzenjani?
IMPENDULO: Mfowethu, iqiniso wukuthi kuyenzeka sifikelwe yizilingo empilweni.
Ngesinye isikhathi ukujola komuntu wakho kungaba yisilingo angene kusona, kanti futhi kungaba wukuthi vele uyisifebe, ungumuntu okhohlakele, ongaziphethe kahle. Kodwa-ke umuntu nomuntu unento ayazi kahle kamhlophe ukuthi ngeke nhlobo ayamukele ebudlelwaneni, eqeda yonke into - ngolukajoji bavamise ukuyibiza nge- deal breaker.
Kusemqoka ukuba wonke umuntu ayazi into angeke akwazi ukuyamukela. Bakhona abantu abazi kahle kamhlophe ukuthi uma beke babamba umuntu ejola, kusuke sekuphelile ngalobo budlelwano. Yindaba engadingidwa leyo, kodwa kwabanye akunjalo, kuyaxoxwa, mhlawumbe indaba ilungiseke.
Nawe-ke kufanele engabe uyazi ukuthi yiziphi izinto ongazimela nongeke uzimele ebudlelwaneni bothando. Kuhle lezi zinto ukuba zidingidwe ubudlelwano buqala.
Kuyacaca ukuthi lesi simo sikuhlukumezile, yingakho nje kunzima ngisho ukuba imizwa yakho imamukele umuntu wakho emuva kwento ayenzile.
Engingakutshela khona wukuba uqaphele, ungabanjwa yizinyembezi zomuntu, kodwa inhliziyo ibe ingavumi. Ngesinye isikhathi izinyembezi zomuntu kazisho lutho. Bakhona abantu abakwaziyo ukukhala lezi zinyembezi okuthiwa ngezengwenya. Zinike isikhathi uyicabange le ndaba. Uma uzwa ukuthi inhliziyo ayivumi, ungaziphoqi.
ALINGICHAZI ISOKA LAMI
NGINENKINGA, ngithandana nowesilisa kodwa akagcwali enhliziyweni yami, kunalokho ngithanda isiboshwa yize sisejele, noma senzani nalona ngichazwa yisiboshwa noma singangenzi lutho.
IMPENDULO: Ngiyazibuza ukuthi pho ngoba uyezwa ukuthi lo mlisa akagcwali enhliziyweni yakho, pho uhlaleleni kuyena - yini lena oyifunayo?
Kungenzeka yini ukuthi uhleli ngoba kukhona izinto akwenzela zona? Uma kuwukuthi uhleli ngoba kukhona izinto akwenzela zona, lokho kungasho ukuthi ufana neqola, uyamsebenzisa ukuba uthole lokho okudingayo. Mubi-ke umuntu oyiqola, osebenzisa abanye ukuze ahlomule.
Yenza ukwethembeka, umtshele lo mlisa ukuthi awumuzwa ngaphakathi, ungambambezeli ngoba ungathola ukuthi yena mhlawumbe unezinhlelo ezinkulu ngothando lwenu.
Musa ukumchithela isikhathi, futhi ungalokothi udlale ngemizwa yomunye umuntu.
ANGISAMFUNI NHLOBO LO MUNTU
NGITHANDANA nomuntu wesilisa kodwa uthando lwakhe angisenalo, ngidinga indlela engingamtshela ngayo. Angisamfuni okwangempela, kuvele kuthi mangihayize uma engithinta. Sizani bo!
IMPENDULO: Impela ngesinye isikhathi kunzima ukutshela umuntu ukuthi awusamfuni, ikakhulukazi uma ekuthanda futhi kucaca ukuthi uzimisele ngothando lwenu, kodwa ekugcineni kumele azi ukuze angabi nethemba elingekho.
Akulona icala ukuthi awusamfuni lo mlisa, futhi akuyona into engajwayelekile ukuba imizwa ishintshe ngale ndlela. Nokho kusemqoka ukuba wehlise umoya uma uzotshela umuntu izindaba ezingemnandi njengalezi, ungamedeleli.
Okokuqala okungakusiza wukuba uthole indawo ongamcela ukuba nihlanganele kuyona. Kungakuhle kube yindawo enizokwazi ukuhlala kuyona ngokukhululeka, nixoxe ningaphazamiseki. Indlela omtshela ngayo ibalulekile.
Ungampikleli futhi ungamvuseli amacala amadala, nezinye izinto esezadlula. Mtshele ukuthi indlela osuzizwa ngayo isishintshile, ayisafani nasekuqaleni. Nokho kumele uqaphele kakhulu isimo sokuphepha kwakho ngoba abanye abantu bayingozi.
Kunabantu abangakwazi ukwamukela izindaba ezifana nalezi, okuthi uma bezizwa, kudungeke umqondo, baze benze nomonakalo omkhulu.
Qikelela ukuthi lapho nikhona uphephile, futhi uma ekuphoqa ukuba niqhubeke nithandane noma ekusabisa, ungesabi ukuyobika kwabomthetho ukuze uvikeleke.
NGABE LIDLALA NGAMI ISOKA?
ISOKA lami linomama wamawele, lathi lihlukene naye kodwa liya kuye lihlale inyanga yonke. Ngabe lidlala ngami?
IMPENDULO: Mtakamama, ungibuza into esobala futhi nawe oyazi kahle kamhlophe. Umqondo womuntu ngesinye isikhathi usebenza ngenye indlela.
Kuye kuthi into uyibona, isobala phambi kwamehlo akho kodwa umqondo ungayemukeli, kube sengathi awuyiboni!
Uma kuyiqiniso ukuthi isoka lakho liyahamba liyohlala nonina wezingane zalo inyanga yonke, lokho kukhomba ngokusobala ukuthi basathandana, akukhona nokuthi bayantshontshelana.
Phela abantu abantshontshelanayo ngeke bahlale inyanga yonke ndawonye. Kuyangikhanyela ukuthi isoka lakho lingumuntu ongathembekile ngoba alikutsheli iqiniso. Kukuwe-ke ukuthi ubhekana kanjani naleso simo, uthatha siphi isinyathelo.
NGABE LE NTOMBI IYANGITHANDA?
NGESHELE intombi ngonyaka owedlule. Bengisebenza noyise, ngabe sengishiya ngayoqhuba izifundo zami kodwa sisaxhumana nayo ngezingcingo. Ngabe iyangithanda le ntombi?
IMPENDULO: Ngiyadideka ukuthi kungani ubuza lo mbuzo. Yini ekwenza ube nalolu ngabazane? Ngabe zikhona yini izimpawu osuzibonile ezikwenza usole ukuthi kungenzeka ukuba ayisakuthandi le ntokazi?
Ngiyazi othandweni ukuthi kuye kube khona oyedwa oye azizwe engakhululekile, ngisho ngaphandle kwesizathu esizwakalayo. Kuyenzeka nje ube novalo lokuthi umuntu wakho uzokushiya kodwa uthole ukuthi yena akekho lapho. Ngesinye isikhathi lolu valo ludalwa wukungazethembi nokuzenyeza.
Ngiyasola sengathi nawe uhaqwe yisimo sokungazethembi - ubona sengathi njengoba ungasasebenzi futhi usuhlala kude, intombi yakho izokushiya. Kumele wazi ukuthi akubo bonke abantu abathanda umuntu ngoba enotho. Kukhona abantu abathanda umuntu eyilokhu eyikhona.
Ngicabanga ukuthi kumele ukhathazeke uma sekunezimpawu zoshintsho ozibonayo entombini yakho, kodwa uma kungekho lutho olushintshile, musa ukuzixaka ngento engenasidingo. Okwamanje thokozela uthando lwenu.
NGIQHUBEKE NGILINDE NOMA NGIDLULELE PHAMBILI?
NGINGOWESILISA obanjwe yintombi engangithandana nayo ingakabikho lena esenginayo manje. Ngiyincengile yathi angilinde isacabanga. Sekuphele izinyanga ezingu-8 (ngilindile), angisazi noma ngiqhubeke ngilinde ngoba ngiyithanda kakhulu kunalena ekhona.
IMPENDULO: Mfowethu, ngingasho engikushoyo kodwa ekugcineni kosuku isinqumo sizophuma kuwena.
Okumele ukwazi futhi ukubeke emqondweni wukuthi ukulindiswa kwakho akukuniki isiqiniseko sokuthi intokazi le izokuzwela, ibuyele kuwe. Kungenzeka ulinde isikhathi eside kodwa ekugcineni izinto zingalungi, bese kufana nokuthi umoshe isikhathi ulinde into engekho.
Kungenzeka futhi ulinde, izinto zilunge. Ngalokhu ngiqonde ukuthi vula ingqondo, uhlakazeke. Lokho kuyokusiza ukuba ukwazi ukwamukela nanoma yisiphi isinqumo esizothathwa yile ntokazi ekugcineni.
Kungenzeka ukuthi isenzo sakho siyishiye ididekile impela, yaphelelwa nawukukwethemba, yingakho kuthatha isikhathi eside kangaka ukuba ithathe isinqumo. Okubaluleke kakhulu wukuba uthole isifundo esenzweni sakho sokungathembeki.
NGIBULAWA YISIKHWELE
NGINENKINGA yokungakwazi ukwemukela umnakwethu phezu kokuba ngamthola ekhona. Mina ngihlala nalo isoka egoli, le ntombi yalo isethekwini. Ngenzenjani kodwa uma kunje?
IMPENDULO: Akuve kubuhlungu ukubanjwa yisikhwele. Nokho indaba yakho ithanda ukuba nzima ngoba ungene endodeni wazi kahle kamhlophe ukuthi inomunye umuntu.
Ngamanye amazwi, nguwena ozifake kulesi simo okuso njengamanje, esesikuxaka. Wenze iphutha ngokuzifaka entweni oyazi kahle kamhlophe ukuthi ngeke ukwazi ukuyimela.
Ngicabanga ukuthi into ezokusiza wukuba ubekezele, kanti uma wehluleka wukubekezela, ungaziphumela kulobu budlelwano.
Isikhwele sibi ngoba singakwenzisa izinto eziwumsangano neziyingozi. Icabangisise le ndaba, bese uthatha isinqumo. Ngikufisela inhlanhla.
* Sicela bonke abafisa ukuthumela imibuzo noma abafisa ukusizakala ezinkingeni ababhekene nazo basebenzise inombolo kawhatsapp ethi 082 070 8034. Sizozama ngakho konke ukuyiphendula imibuzo yenu.