Bazimisele ukulwela ilungelo legama
Umasipala umhlathuze uthi bazocubungula ngokulisebenzisa
UMASIPALA umhlathuze, osembangweni wegama obekubizwa ngalo umcimbi omkhulu wokuhlukanisa unyaka, obudume ngelast Dance, usamile ekutheni unelungelo lokusebenzisa leli gama.
Kuleli sonto lo masipala uchithwe yinkantolo enkulu yasethekwini, ekhiphe isinqumo sesikhashana sokuba ungalisebenzisi leli gama. Umasipala usembangweni waleli gama nomnu Sipho Ndaba, wembawula Investments, obehlela umcimbi waphambilini ilast Dance Music Festival, ubusuneminyaka wenzelwa emhlathuze.
Uthi (umasipala) nakuba uzosihlonipha lesi sinqumo senkantolo, kodwa ukubeka kucace ukuthi isinqumo esiwujuqu ngaleli gama kasikaphumi.
Lo masipala obubambe isigcawu sabezindaba ngolwesihlanu ethekwini, uthe manje bazowubiza ngokuthi umhlathuze NYE Festival umcimbi wanonyaka.
Umnu Mdu Mhlongo, oyimeya yalo masipala ngesikhathi ekhuluma kulesi sithangami, uthe isinqumo senkantolo ngesomcimbi walo nyaka kuphela, sisazophuma isinqumo esiwujuqu lapho kuzocaca ngokusobala ngelungelo laleli gama.
Uthe bewumasipala batshale imali enkulu emcimbini welast Dance, ngakho akulula ukuba baliyekele kanjalo leli gama. Nokho uthe ngeke angene agxile kulolu daba kwazise lusezithebeni zenkantolo.
Umnu Mhlongo uthe umasipala uzokwenza lo mcimbi ngokubambisana nethimba elibizwa nge035 Experience, elihlanganisa abasemkhakheni wezokungcebeleka, usihle Mvuyane owaziwa ngelikadj 15, unqobani Gumede owaziwa ngelika-amenisto nothabani Mjadu owaziwa ngelika-ankel.
Laba kuthiwa yibona abanikwe igunya lokuhlela umcimbi wanonyaka njengoba sebewaqalile amalungiselelo. Imeya icacise ngokuthi laba banikezwe ithuba lokuhlela lo mcimbi kulo nyaka ngenhloso yokuzibonakalisa.
“Uma bewenze ngendlela esigculisayo siwumkhandlu, sizobuyekeza isinqumo, sibanike inkontileka yeminyaka emithathu,” kusho imeya.
Imeya iphinde yathi uma kwenzeka belinqoba icala bazohlangana badingide ukuthi babuyela kwelelast Dance noma baqhubeka nomhlathuze NYE Festival.
Ikuchithile ukuthi phakathi kwezinto ezenze bangaqhubeka nenkampani abafakane nayo enkantolo, kukhona nenhlese yepolitiki, kodwa yavuma ukuthi ike yawezwa amahlebezi afaka inhlese yepolitiki kulolu daba.
Abe-035 Experience bathembisa ukwenza into esezingeni kwazise kabaqali ukuhlela imicimbi. Bathi phakathi kwabaculi abazonandisa kubalwa ukhuzani, Okmalumkoolkat, Culoe De Song, Kwesta, Tipcee, TNS, Professor, Zakwe, Dladla Mshunqisi,
Nomcebo Zikode (Jerusalem), nabaculi bendawo. U-ankel uthe uhlu lwabaculi kalukapheleli njengoba besenezingxoxo nabanye. Imeya iphethe ngokuthi izinhlelo zangosuku lukancibijane kazikaphothulwa njengoba besanezingxoxo nabaxhasi.