UHLELA UKWENZA IZINGUQUKO UMQEQESHI WE-RICHARDS BAY FC
UHLELA ukwenza izinguquko ezinqala umqeqeshi werichards Bay FC ezogadulisana nesteenberg United kowegladafrica Championship namuhla ngesonto ngo-15h30 emhlathuze Sports Complex, erichards Bay.
U-ian Palmer ocija ibay, utshele ILANGA langesonto ukuthi uhlela ukwenza izinguquko ezithile esikimini sakhe kwazise ukholwa wukuthi abanye abadlali bakhe sekuduma amaholidi kazibandlela (December) emakhanda abo. Ibay FC ishayelwe ekhaya ngeledlule yi-ajax Cape Town kuba ngu-3-2 koweligi.
Lokhu kwenze ukuba upalmer ahlale ngesinqe esisodwa kule kilabhu.
Upalmer uthe abadlali bawuvivele lo mdlalo nakuba isimo sinzima. Uthi kumele bawunqobe kumnyama kubomvu ukuhlenga nekusasa lakhe.
“Nginethemba elikhulu lokuthi unkulunkulu uzongisiza ngikwazi ukunqoba lo mdlalo ukuze liphephe ikusasa lami kule kilabhu. Sizolwa kuze kuyophela umdlalo.
"Ngiyazi ukuthi isteenberg idlala ibhola lasecape Town (lamabhola amade ahamba emoyeni) okwenza kube nzima ukubahlelela.
"Ngenhlanhla enkulu sengikwazile ukuyifunda. Ngiyazethemba izikhali zami engizohlasela ngazo kulo mdlalo,” kusho upalmer.
Uqhube ngokuthi okuhle ngalo mdlalo wukuthi uzokuya kuwona nesikwati esiphelele kwazise uthe akekho umdlali olimele.
Umike Lukhubeni ocija isteenberg, uthe ukuqonda kahle ukuthi lo mdlalo uzokuba nzima kodwa noma kunjalo bawafuna wonke amaphuzu.
Uthi bazokuya kulo mdlalo ngaphandle kukasekela Sithole, umoegamat van Reenen nowongezile Mpoki abadonsa izigwebo zamakhadi.
Uthi yonke imidlalo esele imqoka ngokwedlulele. Uthi nokuphuma kwabo kwinedbank Cup kubanike isikhathi sokugxila ngqo kwiligi.
Uthi ubatshelile abadlali ukuthi kumele bayiqaphe nxa zonke ibay FC kwazise inenxeba njengoba iguqiswe yi-ajax.
Kulo mdlalo kuzongenwa ngoR30 esangweni kanti abalandeli bayagqugquzelwa ukuthenga amathikithi kusenesikhathi.
Omunye umdlalo wegladafrica onamuhla ngesonto, iroyal Eagles izokwamukela ifree State Stars ngo-15h30 echatsworth Stadium, ethekwini.