KUBHUNTSHE UMCIMBI KA-RICK ROSS ETHEKWINI
UBHUNTSHE ngomzuzu wokugcina umcimbi womculi waphesheya kwezilwandle obekumele ube sekings Park Outer Fields, ethekwini namhlanje ngesonto.
Lo mcimbi obubizwa ngeblock Party, obufolose ngesihlabani saphesheya, urick Ross, kumenyezelwe izolo ukuthi awusezukuba khona ngenxa yokuntuleka kwabaxhasi bawo. Omunye wabahleli balo mcimbi owaziwa ngokuhlela amaphathi aphezulu, ujunior Lavie, utshele
ILANGA Langesonto ukuthi bahlale phansi nenuwave Entertainment, okuyiyona nkampani ebiyengamele umcimbi, babona ukuthi izinsiza kusebenza azanele, base bekhetha ukuwuhoxisa.
“Ukungabikhona kwabaxhasi kuchaza ukuthi imali ayikho, manje besingeke silinde imali yabantu abazongena (esangweni). Nginqume ukuhoxa ekuhleleni lo mcimbi, yingakho ungasaqhubeki ethekwini. Emafikeng nase-east London usazoqhubeka khona,” kusho ulavie.
Isitatimende ebesibika ngokubhuntsha kwalo mcimbi, sisakazwe izolo ngomgqibelo ezinkundleni zokuxhumana, emakhasini kalavie. Kuleso sitatimende ulavie uxolise kubalandeli bakarick Ross, wathi labo abathenge amathikithi mabalande imali yabo ewebtickets, bazoyithola.
Akucaci ukuthi amathikithi alo mcimbi abesethengwe kangakanani, kodwa emsakazweni obuxhase lo mcimbi, igagasi 99.5 FM ngolwesihlanu emini bekulokhu kumenyezelwa ukuthi awe-vip (izicukuthwane) awasatholakali asethengwe wonke.
Lo mcimbi bekulindeleke ukuba uhehe kakhulu intsha ethekwini, ikakhulukazi njengoba kuyisikhathi samaholide. Umfundi waleli phephandaba ozinze egoli, u-amanda Ngubane, ufonele intatheli ekhala ngokuthi basuke egoli nabangani bakhe bezele wona lo mcimbi.
“Asisazi ukuthi sizoya kuphi njengoba besitshela namhlanje nje ukuthi awusekho umcimbi,” ekhala.