BAKHUTHAZWE UKUWACEBA AMAPHOYISA ANGAWENZI UMSEBENZI EMTHWALUME
AMAPHOYISA kuzwelonke akhuthaza umphakathi wasemthwalume, ogwini oluseningizimu yekwaZulu-natal, okhala ngamaphoyisa asesiteshini ehibberdene ukuthi awawenzi umsebenzi, ukuba ubikele iziphathimandla zamaphoyisa kwisifunda noma esifundazweni, kunokuba uhlele umbhikisho ongekho emthethweni.
Kumanje kunengebhe kulo mphakathi osola ukuthi kunomalugaju obulala ephindelela abesifazane kule ndawo.
Lesi sexwayiso esibhekiswe emphakathini sikhishwe ngokhulumela amaphoyisa kuzwelonke, ubrigadier Vish Naidoo, emuva kokucelwa YILANGA Langesonto ukuba achaze ukuthi kungani kuboshwe unkz Hlengiwe Gambushe obehlele umbhikisho esilobe ngawo kabanzi, kukhalaza umphakathi wasenkambeni nasemnasu ngokuthi abayiboni inqubekela phambili emaphoyiseni asehibberdene njengoba kungakaboshwa muntu ngokubulawa kwabesifazane abatholwa bebulewe abanye becwiyiwe.
Ubrig Naidoo uthe noma lolu kuwudaba oluthinta ngqo amaphoyisa esifundazwe kodwa uyakhumbula ukuthi udaba lokubulawa kwabesifazane nokuhlukunyezwa komphakathi emthwalume lusukunyelwe ngubuholi bonke bamaphoyisa lapho ungqongqoshe Bheki Cele ezifikele mathupha ezozwa izikhalo zomphakathi.
“Ungqongqoshe Cele ngalolo suku (ehambele kule ndawo) wacela bonke ubuholi bamaphoyisa ukuba bunikezele ngezinombolo zabo zomakhalekhukhwini emphakathini, enzela khona ukuthi uma umphakathi ungenelisekile ngokusebenza kwamaphoyisa, uthintane nabo (ubuholi) noma ngasiphi isikhathi.
Ubrigadier Jay Naicker wakwaZulu-natal naye uhambe emazwini kabrigadier Naidoo, wathi ukubhikisha kulezi nsuku njengoba kuvalwe izwe akuvumelekile ngoba kuhlanganisa umphakathi.
Uthe uma kuwukuthi oboshiwe uthweswe icala lokuhlela umbhikisho ngaphandle kwemvume kusho ukuthi wephule umthetho.
Uqhube wathi zikhona izinhlaka zobuholi bamaphoyisa lapho umphakathi ungafaka khona izikhalo zawo uma unganelisekile ngokusebenza kwesiteshi samaphoyisa.
Unkz Hlengiwe Gambushe utshele ILANGA Langesonto ukuthi uthweswe icala lokuhlela umbhikisho ngaphandle kwemvume.
Okhulumela amaphoyisa akwaZulu Natal ukapt Nqobile Gwala uthi unkz Gambushe uthweswe icala lokugqugquzela umphakathi ukuba udale uthuthuva emphakathini.
knowledge.simelane@ilanganews. co.za
* Bheka nasekhasini 10