UZOYIKHA NGAMAHALAVU E-EUROPE UXULU
UZOYIKHA ngamafosholo imali umdlali wakuleli olibhekisa e-europe. Usiyanda “Magazi” Xulu (28) obedlala emuva kwimaritzburg United usayine inkontileka yeminyaka emibili nehapoel Tel Aviv yakwa-israel.
Usayina kule kilabhu nje imaritzburg inqume ukungayeluli inkontileka yakhe ithi umba eqolo. Nokho lo mdlali obemataniswa ne-orlando Pirates kuvela ukuthi uyoyikha ngamahalavu imali kule kilabhu.
Kuthiwa ngenyanga umholo wakhe usondela ku-r500 000 engakafakwa amabhonasi. Leli phephandaba libuza upaul Mitchell isikhulu sesiyavuma Sport Group okuyinkampani ephethe uxulu uthe:
“Angifuni ukungena kakhulu kule ndaba yezimali kodwa engingakusho wukuthi uzozuza lukhulu ngokusayina kule kilabhu.
“Abekhona amakilabhu abemfuna kuleli nakwezinye izindawo zase-europe kodwa sakhetha itel Aviv ngoba ibisinika okuconsisa amathe.
“Njengoba iminyaka yakhe yobudala isihambile nje ngozibandlela (December) uzobe ehlanganisa engu-29 asibhekile ukuthi ahehe amanye amakilabhu ase-europe kodwa sifuna ukuthi abe nozinzo ekilabhini ahlale isikhathi eside. Uxulu okufanele akwenze wukufike lapha alwele ijezi,’’ kusho umitchell.
Limbuza leli phephandaba ukuthi imthole kanjani le kilabhu uxulu uthe: “Kunzima kulesi sikhathi ukuthola ikilabhu e-europe. Kodwa-ke le kilabhu ibilokhu imlandela okuthe uma izwa ukuthi uhlukene nemaritzburg yaqala izingxoxo.
“Ibe isibeka etafuleni ebifuna ukumnika khona, kwaxoxwa savumelana. Ngendlela le kilabhu ehleleke ngayo ike yaxoxa naye ngqo ifuna ukuzwa ukuthi uzizwa kanjani nayo yabe isimtshela ngomlando wayo,’’ kusho umitchell.