Kubongwe amagalelo 'omkhumbi Wokunethezeka'
UZOKHUNJULWA ngesibindi nokumela iqiniso ngezikhathi ezinzima umnu Meshack Radebe obefihlwa izolo ngomgqibelo emaqongqo, emgungundlovu.
Umnu Radede udlule emhlabeni ngesonto eledlule ngemuva kokuxinwa wukugula.
Owayengumengameli wezwe, umnu Jacob Zuma uchaze umnu Radebe njengomngani wakhe omkhulu abebexoxa naye izindaba ezijulile.
Uthe umnu Radebe ubeyindoda enesibindi futhi ebingancethezi njengoba into ubeyisho injengoba injalo, kungakhathalekile ukuthi ihlala kanjani komunye umuntu, inqobo nje uma iyiqiniso.
Uqhube ngokuthi ubeyinsizwa esebenze kanzima yakha ukuthula ehammarsdale ngesikhathi kusenodlame lomnyama nomnyama, engumxazululi wezinkinga ebezibhokile ngezikhathi ezazinzima.
“Akekho umuntu engake ngezwa ukuthi baxatshaniswe (nothile) ngubhungane kodwa baningi engibaziyo abahlanganiswe nguyena,” kusho umnu Zuma.
Uqhube wancoma ubuholi bukamnu Radebe athi ubengagcini ngokuhola uma esesikhundleni kuphela.
“Ubengumholi uma ekubona uphuma eceleni akutshele, kanti futhi ubekwazi ukulandela uma eholwa,” kusho yena.
Uthe ngaphandle kokusebenza kanzima esebenzela ukhongolose, ubewuthanda umndeni wakhe futhi engumuntu onamancoko. Uveze ukuthi bebebizana ngezishimane uma bebonana nomnu Radebe njengoba bebehlale bepiklelana ngokuqonywa.
Umngcwabo kamnu Radebe ubuhanjelwe yidlanzana, kulandelwa imigomo yecovid-19. Phakathi kwabaholi abebeyingxenye yawo kubalwa udkt Zweli Mkhize ongungqongqoshe wezeMpilo, ngumnu Mike Mabuyakhulu oyiphini likasihlalo WE-ANC Kwazulu-natal nabanye.
Nezinye izikhulumi ezahlukene kulo mngcwabo zincome umnu Radebe ngokuba wumholi oqotho futhi obebakhathelele abantu.
Udkt Radebe obeteketiswa ngelikamkhumbi Wokunethezeka, uke waba ngungqongqoshe womnyango wezokuthuthukiswa komphakathi, nomnyango wezolimo nezemvelo esifundazweni.
Ngaphambi kokuthatha umhlalaphansi uke waba yiphini likasomlomo esishayamthetho esifundazweni.