Kudlule inkakha kwezesibhakela
Ukhiqize izingqwele zomhlaba okubalwa novuyani Bungu
UGQEMEKE ingozi engeqiwa ntwala umkhakha wesibhakela eningizimu Afrika kushona umzimase “Bra Mzi” Mnguni ozakhele udumo ngokukhiqiza izingqwele zomhlaba.
Umnguni uhlaselwe yisifo sohlangothi ngemuva kokubandakanyeka ezingozini ezimbili zomgwaqo okuphoqe ukuba ahambe ngesihlalo esinamasondo.
Phakathi kwezingqwele zomhlaba ezikhiqizwe ngumnguni kubalwa uwelcome “The Hawk” Ncita, uvuyani “The Beast” Bungu‚ umasibulele “Hawk” Makepula, uzolani “Tiger” Petelo nabanye abaningi.
Uncita ube yibhokisa lokuqala lase-eastern Cape ukunqoba ibhande lomhlaba ehlula ufabrice Benichou wasefrance ngo-1990 eqhutshwa ngumnguni.
Ubungu uvikele ibhande LE-IBF amahlandla awu-13 eqhutshwa nguyena umnguni obesebenza ngokubambisana norodney Berman wegolden Gloves Promotion.
Umnguni ubehola i-eyethu Boxing Club ngaphambi kokusungula i-eyethu Boxing Promotions.
Le nkakha yiyona esize ikwazulu-natal kwezamankomane njengoba igqugquzele uthulani “Nkunzi” Magudulela ukusungula iludonga Boxing Promotion evamise ukuhlela izimpi kulesi sifundazwe.
Ikhono likamnguni lokucija amabhokisa, yilona elenze unelson Mandela owaba ngumengameli wokuqala wentando yeningi kuleli, wamnxenxa ukuba abe yingxenye yalo mdlalo impilo yakhe yonke.
Umnguni ubesiphila isibhakela, okufakazelwa wukuthi kalikho nelilodwa icala ake wahlulwa kulona kwiboxing South Africa.
Ubeqhosha ngokuthi akanazo izicucu zemfundo ephakeme kodwa akayifundi ayichathe imithetho yesibhakela.
Umnguni ubephinde abe ngomunye wosomabhizinisi abadumile e-eastern Cape.
Uzakhele igama ngokusungula imdantsane Sun Hotel, elokishini, waphinde wathuthukisa i-eyethu Spaza Shop yagcina isiyihighway Spar futhi ubenolunye uxhaxha lwamabhizinisi ehlukene.