I-SASSA IKHUTHAZA ABAKADEKLE KA-R350 UKUBA BAHOLE EMABHANGE
ISOUTH African Social Security Agency (Sassa) Kwazulu-natal, ikhuthaza abahola imali yabangatohozi ukuba babhalisele ukuhola emabhange kunokuyominyana emaposini.
Unkk Sandy Godlwana okhulumela isassa kulesi sifundazweni ekhuluma NELANGA Langesonto izolo, uthe benza ngakho konke okusemandleni ukuthuthukisa indlela abantu abangawuhola ngayo u-r350 oyisibonelelo sikahulumeni sabantu abangasebenzi.
Ukusho lokhu kulandela ukuba umengameli wezwe umnu Cyril Ramaphosa ngolwesine ememezele ukuthi abantu bazoqhubeka nokuhola le mali ezinye izinyanga ezintathu. Umengameli umemezele lezi zindaba ngesikhathi ethula inkulumo yesizwe.
Ukuholwa kwale mali ewumhlomulo wesikhashana kuqale ngonyaka owedlule ngemuva kokubheduka kwegciwane elidala icovid-19.
Unkk Godlwana uthe kasikho isidingo sokuba abantu babhalise kabusha njengoba abebeyithola, bazoqhubeka bayithole. Unxuse abantu ukuba babhalisele ukufakwa kwale mali kuma- account abo asemabhange ukuze bagweme ukuyominyana emaposini njalo uma kumele bahole.
Uthe imininingwane yokubhalisela lokhu iyatholakala kwi- website. Uveze ukuthi bahlale bezithola izikhalo ngendlela okugcwala ngayo emaposini, yingakho benxusa abantu ukuba basebenzise ubuchwepheshe ukwenza impilo yabo ibe lula.
“Kukhalwa nangokuqhelelana kwabo okuyinto engenzeki kwesinye isikhathi kanti nasemaposini kuthathwa isibalo esithile sabantu abasuke bezohola ngalolo suku, okuyinto egcina inenga abantu kakhulu,” kusho yena.
Uthe basavulile ukuba abangakayitholi babhalisele ukuyithola besebenzisa imininingwane yabo eqondile ukuze bangachithwa.
“Kwesinye isikhathi abanye bachithwa ngenxa yokuthi imininingwane yabo ayihambisani futhi basebenzisa ama- sim card angabhalisiwe ( rica), okuyinto ebalulekile ukuze sikwazi ukuqonda ukuthi kuhola umuntu oqondile futhi awukho umkhonyovu,” kusho unkk Godlwana.
I-sassa iveze ukuthi kusukela iqalile ukuholela abantu, isisebenzise imali engaphezulu kukaR16 billion kusukela ngonhlaba (May) wonyaka odlule kuze kube umasingana (January) wanonyaka. lucky.cain@ilanganews.co.za