UZOKHUNJULWA NGAMANCOKO OWESKWATTA KAMP
LIZOKHUNJULWA njengomuntu obebeka into injengoba injalo kungakhathaleki ukuthi ihlala kanjani komunye, ilungu leqembu le- hip hop iskwatta Kamp, umusawenkosi “Nish” Molefe ( osesithombeni), obengcwatshwa ngolwesihlanu.
Unish udlule emhlabeni ngesonto eledlule ngemuva kokuxinwa wukugula okuhlobene necovid-19.
Uchazwe ngusiya Metane odume ngelikaslikour, ongelinye lamalungu aleli qembu elizakhele udumo eminyakeni yama-2000, njengenjini ebisebenza buthule njengoba kunguyena owaqhamuka negama iskwatta Kamp.
“Unish ubebambe iqhaza elikhulu eqenjini. Nakuba ebengagqamile kodwa indima abeyidlala ibibaluleke kakhulu kusukela ekuqanjweni kwezingoma nokuqhamuka neminye imiqondo ephusile yokuthuthukisa iqembu,” kuchaza uslikour.
Uthi okubuhlungu ngokudlula kukanish wukuthi bebesazama ukuphola ngokulahlekelwa nguflabba owabashiya ngokukhulu ukuzuma ngo-2015 ngemuva kokugwazwa ngowayeyisithandwa sakhe.
“Besisanda kuphothula i-albhamu yethu ebesizimisele ukubuya ngayo emculweni, ebesihlele ukuyikhipha ngoMbasa (April) nonyaka. Ziningi izinhlelo ebesinazo ngale albhamu ebesizihlela naye,” kuchaza uslikour.
Uthe ngaphandle kokusebenza ngokuzikhandla kukanish eqenjini, ubebuye abe namancoko okuyiwona abayohlale bemkhumbula ngawo.
“Kubantu abaningi ubengumuntu onamahloni, kodwa kithina ebesimjwayele ubeqaqekile, ethanda ukuzibhedela asihlekise kuze kube buhlungu izisu,” echaza. Uthi unish ubesondelene kakhulu noflabba njengoba kunguyena owamfaka kuleli qembu eselisele naye, ubozza, ushugasmakx, unemza norelo.
Uthe basazohlala phansi beyiqembu badingide ngendlela eya phambili njengoba konke sekuphothuliwe nge-albhamu yabo.
Iskwatta Kamp ngelinye lamaqembu ehip Hop elaba nedumela laphinde lahlabana ngenqwaba yezindondo ngezingoma zalo okubalwa kuzo esihloko sithi, "umoya"
nezinye.