KUBHUNTSHE UHLELO LWE-SANTACO LOKUQOKA UMSHAYELI WETEKISI OVELELE
KUBHUNTSHE uhlelo lweSouth African National Taxi Council (Santaco) KwazuluNatal lokukhetha umshayeli wonyaka ovelele wetekisi kanye nezinye izinhlelo zale nhlangano.
ILANGA Langesonto litshelwe ngumnu Sifiso Shangase ongumphathi wehhovisi lesantaco Kwazulu-natal ukuthi umcimbi obekumele ube namhlanje ngeSonto kawusekho njengoba nabo beyimboni benanele ikhwelo likamengameli wezwe, umnu Cyril Ramaphosa, ngokugcinwa kwemibandela yecovid-19.
Uthi bathathe isinqumo sokungawenzi lo mcimbi ngoba bethobela umyalelo kahulumeni wokungahlangani kwabantu abaningi endaweni eyodwa.
Umnu Shangase uthe kakusiwona kuphela umcimbi wokukhethwa komshayeli wonyaka ovelele ohlehlisiwe, kodwa kuhlehliswe nemidlalo yebhola eyenziwa yinhlangano yabo, kanjalo futhi nokhetho lobuholi obusha besifundazwe obekumele lube nonyaka.
“Siyimboni yamatekisi kasigcini ngokubheka inzuzo yethu kodwa sibuye sibuyisele nakubashayeli bethu, yingakho sinomkhankaso wokubheka umshayeli ovelele wonyaka. Lo mcimbi womshayeli ovelele bekumele ube ngesonto (namhlanje), kodwa wagcina uhlehlile, ngoba siyazi ukuthi uba nesasasa kubashayeli nakubabukeli abafuna ukuwuhambela, ngakho bekuzoba nzima ukugcina isibalo esivumelekile kuhulumeni sokuhlangana kwabantu.
"Lapha siyaye sithathe abashayeli abakhethwe ngabagibeli njengabavelele kososeshini babo, bese bedlana imilala ngokuthi sibabuyisele ekuhlolweni abakwenzayo mhla bethola izincwadi zokushayela. Baqala phansi bafunde ik53 bese beyahlolwa sibanikeze amatekisi bahambe baye emkhondeni bayovivinywa ukushayela kwabo baye nasemapalini.
"Laphaya emkhondeni basuke behlolwa ngamaphoyisa omgwaqo. Sibe sesikhetha abashayeli abathathu abaphumelele, owokuqala simgixabeze ngo-r15 000, owesibili u-r10 000, owesithathu ahambe no-r5 000.
"Owokuqala uphinde ahlomule ngeholidi lesonto lonke ecape Town ehamba nothandiweyo wakhe,” usho kanje.
Umnu Shangase uphethe ngokudalula ukuthi nakubona uyezwela umkhizo ejazini njengoba amatekisi abo engasasebenzi njengakuqala selokhu kwabheduka ukhuvethe. Uveze ukuthi imigomo kahulumeni yokunqanda ukuhlangana kwabantu iziphazamisile ezinye izinhlelo zenhlangano abebenazo nonyaka.
Uthe bayayihlonipha imiyalelo kahulumeni ngakho ngeke baphikisane naye uma evikela impilo yabantu.